Categories
Hannunka mai sanda

Harin Alhussiyun garin Makka: Abubuwan da ya kamata kowa ya sani

Duniyar Musulunci ta yi Allah Ya tsine da harin da aka kai garin Makka wanda Allah Ya ba jami’an tsaro na Saudiyya ikon kakkabo wannan makami mai lizami da wadannan ‘yan ta’addan suka harbo zuwa birnin Makka mai daraja.

Wannan makami da ya fito daga wani gari da ake kira da Saada gari ne da ke gabar (border) kasar Saudiya wanda garin yana cikin kasar Yamen inda wata kungiyar shi’a da ake kiranta Alhusiyyun suka kawo wannan harin.

Irin wannan harin ba shi ne na farko da ake kokarin kawowa wadannan garuruwa masu alfarma ba, kusan a cikin sati guda an sami nasarar kakkabo irin wadannan makamai masu linzami har sau biyu.

Da farko dai ya kamata duk wani musulmi ya sani cewar wannan addinin musulunci da muke takama da shi yana da inda aka kyankyashe shi, kuma kodama baka da ra’ayin wani kungiya ko bangare a cikin addini in dai kai musulmi na gaskiya ne ka yi imani da rukunan musulunci guda biyar, ga wadanda suke ikirarin su Ahlussunna ne Wal Jama’a wanda ya tattara dukkanin wasu kungiyoyi da akidu na Musulmai banda masu da’awar Shi’a, kasan cewar rukuni na biyar shine ziyartar dakin Allah mai alfarma.

Komai kiyayya da mutum yake da ita ga kasar Saudiya, yasan cewar Allah ya albarkace ta da abubuwa guda biyu da duk duniya babu wata kasa ta samu wadannan abubuwan, saukar wahayi na farko a garin makka na karshe a garin Madina, haihuwar Manzon Allah a garin Makka, mutuwarsa a garin Madina, wadannan garuruwa har duniya ta nade wadannan ni’imomi ba za su canza ba. Komai bakin cikin mai bakin ciki da kiyayyar mai kiyayya.

Duk Musulmi ya sani cewar idan lokacin aikin hajji ya zo, burinsa shine yaje ya sauke farali a wannan gari na Makka. Babu wani musulmi na arziki da gaskiya da yake inkarin wannan gari na Makka da cewar ba tsarkakken gari ba ne, babu wani musulmi da ya ke shakkar cewar yana daya daga cikin garin da hatta tsiro da dabbobi a kwai lokacin ba a farautar su ko kuma cutar da su.

Shi yasa wannan gari shi kadai ne garin da koda kana boye ne ka yi niyyar ko da a zuci ne, ka ce idan na je sai na yi sabon Allah ko ta’addanci, Allah zai rubuta maka zunubin kar ka aikata ne, shi yasa duk mutum da aka kamashi yana da niyar yin ta’addanci da wadannan birane guda biyu yake yanke mishi hukuncin kisa.

Akwai kungiyoyin musulmai guda biyu da suke da burin garin sun rasa dakin Ka’aba ko kuma sun keta alfarmar garin Makka da Madina, wadannan kungiyoyi su ne, Shi’a da kuma Khawarij. Shi’a tana da ikirarin ganin an keta alfarmar garin Makka da Madina saboda su a ganin su Manzon Allah bai kamata a ce yana kwance a wannan kasar kafira ba, kasa ce wacce bata da tsarki, kasa ce wacce makiyan jikokin Manzon Allah suke kwance a cikinta, sune wadanda suke ganin kuskure aka yi wurin aikowa da manzon Allah annabci, sune suke ganin manyan aminan Manzon Allah sun ci amanarsa, sune suke ganin aminan Manzon Allah sun hana yar sa gadon ta, da dai maganganu akan ganin cewar wannan garuruwa ba su zama masu tsarki ba. Da wadannan dalilai ne malamansu suke bada fatawa a cikin littattafansu cewar kaiwa garin Makka hari ba laifi ba ne, sannan kuma kashe duk wani mutum da ba su ba lada ake samu.

Khawarij kuwa mutane ne masu akidar Ahalussunnah wadanda suke fassara Ayoyin Alkur’ani da Hadisan Manzon Allah da ra’ayinsu, basu yarda da duk wata magana da ta fito daga bakin wani malami ba sai dai malaman su, ba su yarda da tawilin da ya saba musu ba, sun yarda da kashe duk wanda bai yarda da hanyar da suke kan ta ba, sun kuma halasta jinin duk wani musulmi da bai yi shari’ar musulunci irin wacce suka ce ita ce shari’a ba, suna iya kashe duk wanda Annabi SAW ya ce ya haramta kashe shi.

A watan Ramadana aka kai hari Masallacin Manzon Allah SAW inda yake kwance da bom wanda a lokacin dan kunar bakin waken da ya kai wannan harin Allah bai bashi sa’ar karasawa jikin Masallacin ba bom din ya tashi da shi, wadanda suka dauki alhakin kai wannan harin sune Khawarij wanda suke ganin gwamnatin Saudiya kafira ce, kuma duk da ittifakin duniyar akan cewar ita kadai ce kasa a Duniya da take yin shari’ar musulunci na gaskiya amma wannan bai kubutar da wannan kasa da barazar irin wadannan miyakun Kuraye masu sanye da fatun Akuya ba.

Shi kuwa wannan harin da aka kai, wanda duniyar Musulunci tayi Allah Ya Tsinewa duk wanda ke da hannu a kan wannan harin shi da yake da makami mai linzami ne aka aiko daga wannan garin na Saada wanda ‘Yan Shi’a da suke da suna Alhusiyyun suka kai ya sanya an fahimci cewar zai wahala mutumin da yake ikirarin musulunci na gaskiya ya kaiwa garin Makka hari.

Akwai abubuwa da jama’a da dama ba su sani ba game da wannan harin da aka kawo da kuma shin wane irin makami aka yi amfani da shi wurin kai wannan harin ba? A hakikanin gaskiya, irin wannan makami ba kasafai ake samun shi a wurin kungiyoyin ‘yan ta’adda ba, kasancewar shi wannan makami da suka yi amfani da shi yana tafiyar kilomita dubu ashirin ne a sa’a guda (20,000 km/h). Wanda duk ya san wannan gari na Saada ya san cewar tsakanin sa da garin Makka bai wuce kilo mita dari biyar ba (500 km) wanda yake nuna cewar idan aka jefa wannan makami mai linzami cikin minti daya da rabi zai kai garin Makka.

Sojojin Saudiya Allah Ya basu nasarar kakkabo wannan mugun makami a cikin minti daya da dakika ashirin wanda ya nuna saura dakika goma wanda su ‘Yan Shi’a suka harbo a ranar 27 ga watar Oktoba 2016 da misalin karfe tare na dare (9:00pm) daga wannan garin na Saada dake kasar Yamen kusa da gabar garin Makka.

Kamar yadda hukumar tsaro ta Saudiya ta sanar cewar dakikoki tamanin da suka bata kafin su kakkabo wannan makami mai linzami sun yi kokarin ganin makamin bai fado a garin da yake da yawan jama’a ko kuma inda mutane suke yin hada-hada ba. Daukan wannan lokacin kafin su kakkabo wannan makami ya taimaka matuka wurin kiyaye rayukan mutanen da suke kauyen Barzah inda nan ne makamin ya fado.

Duk da cewar al’ummar wannan garin Barzah sun ga wannan al’amari amma kuma wannan bai hana su ci gaba da gudanar da ayyukansu na yau da kullum ba.

Kamar yadda muka fada cewar wadannan kungiyoyi guda biyu Alhusiyyun da ISIS ba wannan karon ba ne kadai suka taba kai hari garin Makka ko Madina ba, duk da cewar Allah kowane lokaci yana tona asirin su, kuma yana sa ana gane makircin su a kodawane lokaci.

Wannan kungiya ta Alhussiyyun wacce kungiyar ‘yan shi’ar kasar Yeman wacce ke da tsattsaurar ra’ayi da kuma nufin ganin ta kasa gwamnatin shi’a da taimakon kasar Iran, an kafa ta ne a shekarar 1992. Suna kiran kansu da ‘Ansarullah’ wato masu taimakon Allah.

Duniya gaba daya a yanzu ta fahimci cewar gwamnatin Iran ita ce ta yi makircin kai wannan hari. Duk da cewar kasar ta fito ta barrantar da kanta daga wannan harin amma bata yi haka ba sai da kasashen duniyar suka nuna mata cewar ita ce ta sa a kai wannan harin kasa mai tsarki.

Kasar Saudiya tace daga shekarar 1980 zuwa yanzu kasar Iran ta kai hari kusan guda goma garin Makka wanda cikin ikon Allah duk lokacin da suka zo da irin wannan makircin sai Allah ya kubutar da su.

To bayan da su ‘yan Shi’an Alhusiyyun suka ga duniyar gaba daya tayi tofin Allah Ya tsine sai suka fito suka ce su ba manufarsu su kai hari garin Makka ba, wai su sun so ne su kai hari filin tashi da saukar jirage na Sarki Abdul Aziz da ke Jidda. Kuma sun yi haka ne domin suna neman wanke kan su daga zargin so rusa dakin Allah mai alfarma.

Kaiwa garin makka hari kamar kaiwa musulmai biliyan daya da milayan dari biyar ne hari (1.5billion) da suke cikin duniya, kuma Musulman duniya baki daya suna bayan kasar Saudiya game da taba Masallacin Harami ko kuma Masallacin Annabi Muhammadu Sallallahu Alaihi Wa Sallam.

A karshe muna kira ga jama’ar mu wadanda suke wannan kasa ta Najeriya da suke da’awar Shi’a su sani cewar wannan da’awar babu inda zata kaika sai ga kiyayya ga garin Makka da Madina, da kuma karyata Annabicin Manzon Allah, da cin mutuncin wadanda ya barwa wannan addini har muka same shi, da karyata ayoyin kur’ani, da fito na fito da shari’ar Allah, da kuma kai mutum ga wutar Allah.

Allah ka tsare mana imanin mu da addinin mu, ka tsare Addinin Musulunci da Musulmai daga sharrin kowane me sharri da haddasa da kiyayya da ke ta da mugunta a duk inda muke, ya nuna mana gaskiya gaskiya ce, ya bamu ikon bin ta.

Categories
Hannunka mai sanda Rahoto

Gajiyawar Ahlussunna Wajen Cin Gajiyar Shugabancin Sheikh Bala Lau

Ba kasafai ake samu a cikin al’umma dace da shugaba mai hangen nesa da kuma ganin an ciyar da al’umma ba, musamman al’ummar Musulmai da suke yin da’awar Sunna a Afirka ba. Hasalima a wannan lokacin da shuwagabanni suke cikin ruɗani na rikice-rikicen matsayi da kuma ganin mai za su samu mai kuma za su riƙe da kuma ganin sun handame da kuma yin babakere a cikin al’amuran al’umma, sai ga shi ita Ƙungiyar Jama’atu Izalatil Bidi’ah Allah Ya amsa mata buƙatarta da addu’o’in da ta daɗe ta roƙon Allah na Ya azurta ta da shuwagabanni masu tsoron Allah, tausayi da kuma hangen nesa cikinsu har da Sheikh Bala Lau.

A cikin wannan dogon rubutu da zan yi ba zai iya wadatar da abubuwan amfani da ci gaba da wannan bawan Allah yake gabatarwa ba, da kuma irin ɗimbin nasarori da ya samu a cikin ɗan ƙanƙanin lokaci ba.

Kafin in fara magana a kan nasarori da kuma irin ci gaban da ya kawo sai na fara kawo mana abubuwa da dama da muka rasa da kuma dalilai da ya sanya Duniyar Computer ta ɗauki wannan jarumin shugaba ta kuma ce za ta yi tsokaci na musamman a kansa.

Ɗaya daga cikin matsalolin musulmin Najeriya ita ce, ina muka dosa, bayan kasancewar mun san cewar ga daga inda muka fito. Rashin sanin takamaimai wurin da muka dosa shi ne babban matsalar wannan al’umma. Hakan ta faru ne tun daga lokacin da muka rasa manyan jagororin al’umma kamar su Sheikh Abubakar Mahmud Gumi (Allah Ya yi mishi rahama), Alhaji Ahmadu Sardaunan Sokoto (Allah Ya yi mishi rahama). Rashin waɗannan bayin Allah ya kawo taɓarɓarewar jagoranci da kuma sanin ina musulmai suka nufa.

Matsaloli ba su da adadi wanda wannan al’umma take fama da su, kama daga haɗin kai na al’ummar musulmai da kuma ƙoƙarin neman ganin an cike gurabun da ya kamata a ce musulman wannan ƙasar sun cike na wuraren ilimi da muƙamai da ma kowane irin fanni.

Shugaban Izala na Kasa Sheikh Abdullahi Bala Lau tare da Shugaban Najeriya Muhammadu Buhari
Shugaban Izala na Kasa Sheikh Abdullahi Bala Lau tare da Shugaban Najeriya Muhammadu Buhari

Musulmai a wannan ƙasar ba su da wata babbar makarantar jami’a ta zamani da za ta ware wani bangaren na al’umma kodai maza zalla ko kuma mata zalla da zasu karantar da ‘ya’yansu ilimi na haƙiƙa da kuma tarbiya ta addinin musulunci.

Wannan al’umma ta rasa yadda za ta kawo wata hanya da zata iya dogaro da kanta na ganin ta kafu da ƙafarta wurin ganin an samu abubuwan more rayuwa da kuma abubuwan da al’umma zata riƙa dogaro da shi wurin tafiyar da al’amuranta na yau da kullum.

Idan muka dawo ta ɓangaren Ahlussunnah a wannan yanki namu na Arewa sai muga cewar mune koma baya matuƙa a cikin harkokin tafiyar da hanyar yin da’awa da kuma yadda ya dace ace muke tafiyar da al’amuranmu na yau da kullum.

Mas’alolin suna da yawa amma bari in taba mana wani bangare da yake damun duk wani Musulmi da yake cikin Arewa, shi ne maganar Asibitin Musulmai wanda ya amsa sunansa, kuma wanda lallai idan kana da kowace irin matsala idan ka je wannan wuri buƙatarka ta biya. Musamman idan muka ce za muyi maganar cakuduwar maza da mata da kuma samun kwararrun likitoci da kuma kayan aiki na zamani sai muga cewar lallai bamu da irin wannan asibiti.

Sheikh Abdullahi Bala Lau lokacin da yake bikin kaddamar da hannaye da kafafuwan robobi
Sheikh Abdullahi Bala Lau lokacin da yake bikin kaddamar da hannaye da kafafuwan robobi

Ya ake ɗaukar aiki, wa kuma ya dace a ɗauka wannan itama matsala ce mai zaman kanta da take damun musulmai kasancewar a baya saboda su Malam Abubakar Mahmud Gumi ana ƙoƙarin ganin an bai wa musulmai haƙƙinsu, amma bayan rasuwarsa sai aka rasa wanda ya damu da ganin an baiwa musulmai guraben da ya dace da su.

Su wane suke wakiltarmu a fannoni da muƙamai a wannan ƙasar, su wane ne suke yin magana da yawun musulmai da kuma ganin an magance ita irin wannan matsalar. Musulmai da suke Majalisar Wakilai da na Dattijai nawa muke da su, sannan suna yin abubuwan su domin kare muradun al’umma ne ko kuma suna yi domin ganin sun wakilci kawunansu da iyalan su da kuma iyayen gidajensu ne?

Ganawar Shugaban Kungiya ta Kasa Ash-Sheikh Imam Abdullahi Bala Lau da Hukumar Wa'azi ta kasar Saudi Arabia a office dinsu dake Makkah ta Kasar Saudi Arabia.
Ganawar Shugaban Kungiya ta Kasa Ash-Sheikh Imam Abdullahi Bala Lau da Hukumar Wa’azi ta kasar Saudi Arabia a office dinsu dake Makkah ta Kasar Saudi Arabia.

Wace hanya al’ummar nan take bi domin ganin mun sami guraben karatu a jami’o’in mu na cikin gida da waɗanda suke ƙasashen ƙetare. Wani irin abu ɗalibai masu ƙaro ilimi suke yi da kuma wani irin gudunmawa za su iya bayarwa a wannan ƙasar idan suka dawo. Wa ya damu da wane irin ilimi ɗalibai suke zuwa nema da kuma wa ce irin aƙida ce suke iya dawowa da ita wannan ƙasa.

Wane irin da’awa ta dace da wannan zamani, ina kuma ya kamata a ce an nufa, da su wa ya kamata a ce ana tafiya, wannan ita ma wata katuwar matsala ce da wannan al’umma ta Ahlussunnah suke fuskanta.

Kwatsam sai ga Bala Lau.

Bayan da Allah Ya ƙaddara rasuwar shugaban Kungiyar Jama’atu Izalatil Bidi’ah Wa’iƙamatis Sunna na ƙasa, Sheikh Maigandu Usman, kuma majalisar malamai suka yi ittifaƙin cewar babu wanda ya dace a bai wa wannan muƙamin sai Sheikh Abdullahi Bala Lau. Wannan matsayi da aka ba shi ya rikita shi matuƙa domin duk wanda yake wurin babu wanda bai tausaya mishi ba, wasu ma sai da suka taya shi kuka bisa abin da ya tsinci kansa yana yi na yin kuka a wannan lokaci, ba domin komai ba sai don yana ganin wannan matsayi na farko ba shi ya kamata a ce an bai wa ba, sannnan kuma yaya zai yi da irin waɗancan matsalolin da ita wannan al’umma take ciki.

Daya daga cikin kafanoni da Shugaba ya samar domin rage zaman banza
Daya daga cikin kafanoni da Shugaba ya samar domin rage zaman banza

Allah ba ya shawara da mutum, shi ya fi kowa sanin irin gudunmuwa da kariya da kuma juriya da wannan bawa na Shi zai iya yi a cikin wannan al’umma. Ba zan so in tsawaita bayanai ba game da shi Sheikh Abdullahi Bala Lau a karan kansa ba, domin ba ya bukatar a gabatar da shi kasancewar ko da wane lokaci shi baya ɗaukan kansa a matsayin mai mulki illa jagora.

Mai Son Haɗin Kan Al’umma Ne

Jama’a da dama a farkon sake rabuwar ƙungiyar Izala, suna zargin ɓangaren Sheikh Abdullahi Bala Lau a matsayin ɓangaren da ya zama na ‘yan santsi, amma daga bayan sai jama’a suka fuskanci wannan rabuwa ba ta da alaƙa da wannan ɓangare. Duk wanda yake tare da Sheikh Bala Lau ya san mutum ne mai son al’umma ta haɗu wuri guda, kuma mutum ne mai son ganin Ahlussunnah suna tafiya kan tafarki guda, kuma ya kasance musulmai suna da murya guda ɗaya.

Shugaba Bala Lau a Studio na Manara TV da Rediya a Abuja
Shugaba Bala Lau a Studio na Manara TV da Rediya a Abuja

Misalai da dama sun nuna wannan al’amari na Bala Lau, kasancewar shi ba wai magana kawai ita ce ke nuna son yin abu ba. Ayyukan da yake ya gabatar da kuma uzurori da ya bayar wanda ba a buƙatar faɗinsu a nan, ya isa. Shi kaɗai ne shugaban da ake hawa mimbarinsa a yi kira kai tsaye a kansa. Duk wani dattijon Malami idan ya hau mimbarinsa zai nuna mishi muhimmancin haduwar kai, kuma bai taɓa nuna wa kuma bai taɓa hanawa ba. Hasalima wannan abu yana daga cikin abin da ya fi damunsa.

Amma ya za ka iya, Da Allah Ya so da ya sanya al’umma guda, amma ba za su gushe suna saɓawa juna ba. Duk da irin hanyoyi da yake bi cikin sirri da na fili na ganin an samu haɗin kai ga al’ummar Ahlussunnah baki ɗaya a mataki na ƙasa tare da ‘yan majalisarsa, ya sanya dole ya canza salo tun da shi wannan haɗin kai ba wai Hausawa kawai ake magana ba, sai ya ga ya dace ya haɗa dukkanin Ahlussunnah na Najeriya baki ɗaya, tun daga Yarbawa da Inyamirai da Nupawa wanda Allah Ya duba zuciyarsa ya ga da gaske yake yi ya kuma tabbatar masa da haka.

A yanzu haka dukkan wani al’amari da ya shafi Ahlussunah da suke faɗin ƙasar nan Sheikh Bala Lau yana da masaniya a kai, tun daga kudu da yamma da arewacin kasar Allah Ya tabbatar mishi da haka.

Ba a Najeriya kaɗai ya tsaya ba, ya yi ƙoƙarin haɗa kan Ahalussunnah na Afirka gaba ɗaya, inda ya shirya taro irinsa na farko tun kafuwar wannan ƙungiya na ganin dukkanin Ahalussunah da suke Afirka suna magana da murya guda.

A taron da aka gabatar a makon jiya (17-03-2016) an yi shi ne domin ganin an tattaro Ahalussunah na Duniya su shigo wannan ƙasa domin ganin an tabbatar wa da Duniya cewar musulunci ba shi da alaƙa da ta’addanci kuma a kara ƙulla alaƙa tsakanin dukkanin Musulman Najeriya da kuma sauran Musulman Duniya baki ɗaya. Duk da cewar shi Shugaba ne International kasancewar a yanzu yaƙi ɗan zambo ne, bai bar musulmai ko Ahlussunah zalla su yi wannan taro ba ya haɗa da dukkanin wadansu kungiyoyin addinin musulunci da ma wadanda ba musulmai ba.

Idan kuwa aka zo maganar ɗalibai masu karatu a ƙasashen waje musamman masu karatun addini, kusan babu wata ƙasa da ɗaliban ilimi suke yin karatu da Sheikh Bala Lau bai ziyarce su ba, kuma bai basu wata dama ta a dama da su da yadda za a ƙara bunƙasa wannan tafiya ta sunnah ba. Abu na farko da ya fara yi, shi ne ƙoƙarin tattaro kan waɗannan ɗalibai da saka su cikin da’awa da wa’azi da kuma sanya su cikin jerin masu yin Tafsiri a Masallatan Ƙasar nan baki ɗaya.

Fatu, Fatar Rago da aka tara domin aikin Kungiyar Izala
Fatu, Fatar Rago da aka tara domin aikin Kungiyar Izala

Idan muka zo ga ɗalibai matasa samari, wannan bawan Allah ya yi ƙoƙarin haɗa kan dukkanin samarin malamai matasa wuri guda, wanda ya jawo ɗalibai masu da’awar Salafiyya cikin tafiyar sa, sannan kuma ya kusanto da su cikin jerin al’amuran da ake yi na yau da kullum a cikin wannan tafiya. Wanda ba ya son haɗin kan al’ummarsa ba zai taɓa damuwa da ganin haka ba.

Mai tausayin al’umma ne, da kare martabar su.

Sheikh Abdullahi Bala Lau shugaba ne mai sauƙin ra’ayi da kuma tausaya wa al’ummar musulmi. Wannan ɗabi’a da yake da ita, duk wanda yake tare da shi zai faɗa maka cewar Sheikh Bala Lau mutum ne mai tausayin al’ummarsa domin duk lokacin da aka shirya wani taro da za a tara jama’a burinsa shi ne ganin kowa ya samu abubuwa cikin sauƙi.

Tun daga lokacin da wannan bawan Allah ya tsinci kansa a cikin wannan shugabanci duk lokacin da ake son a shirya wani taro zai tabbatar ba a kaishi inda jama’a za su ƙuntata ba. Zai ga ya yi iya iyawarsa domin an kawo wa’azi ko taro cikin gari ba ƙauye ba domin ka da wadanda ake son su zo domin sauraron wannan wa’azi ko taro su wahala.

Duk wani abu da zai shafi lafiyar al’umma yana kaffa-kaffa da shi. Shi ya sa daga cikin sanarwa da yake bayarwa duk lokacin da za a yi wata tafiya mai nisa shi ne “don girman Allah direbobi ku yi tafiya sannu cikin hankali, ban da gudu banda yin tsere ku tsare rayukan al’umma” Wanann jawabi irin shi kuma zai sake yi lokacin da aka tashi taro. Allah cikin ikonsa an sami sauƙi matuƙa wurin yin haɗura wajen zuwa ko kuma dawowa daga wa’azi.

Idan kuwa ta Allah ta kasance har aka yi hatsari zai yi ƙoƙarin ganin waɗanda suka jikkata ya ɗauki ɗawainiyar kuɗaɗen asibitinsu da kuma zuwa duba so, ko dai shi karankansa, ko kuma ya tura a wakilce shi.

Wa’azi na ƙasa da aka shirya a kwanakin baya wanda aka so ayi a Jihar Kanon Najeriya ya bai wa mutane da dama mamakin wannan bawan Allah, kasancewar ana gobe za a yi wannan taro aka samu marasa tsoron Allah suka kai hari wanda ya yi sanadiyyar mutuwar mutane da dama a kasuwar waya. Wannan bawan Allah ya kira taro gaggawa na masu ruwa da tsaki a cikin wannan ƙungiya ya ce ba zai yiwu a ce jama’a na cikin jimami ba, mu kuma muna taro domin yin wa’azi ba.

Manara TV da Rediyo
Manara TV da Rediyo

A lokacin jama’a da dama sun kasa fahimtar haka, a lokacin aka samu wasu ‘yan uwa suna faɗin ai wannan nuna tsoro ne da kuma gajiyawa da kuma bada ƙofa. Sheikh Bala Lau ya nuna cewar da a ce a sake rasa ran musulmi guda ɗaya a sanadiyarsa gwamma a dakatar da kowane irin taro.

Allah Ya sani wannan bai kuma sanya shi mai rauni idan abin da ya shafi taɓa mutuncin musulunci da musulmai ba. Lokacin da a wannan ƙasa aka rasa ina al’umma za ta nufa idan aka taɓa mutuncinta, a daidai wannan lokaci Allah Ya kawo Sheikh Lau. Kuma ya yi ƙoƙari matuƙa wurin kare mutuncin jama’ar da yake jagoranta da ma waɗanda ba ya jagoranta.

Babu wani cin zarafi da ake yi wa musulmai a wannan ƙasa da bai fito kafafen yaɗa labarai ba ko na gida ko na waje domin nuna rashin jin daɗin sa a kai. Kodawane lokaci kunnesa na jin koke-koke da ƙorafe-ƙorafen al’umma. Wannan shugaba shi ne na farko wanda ya ke kallon mene ne waɗanda ba musulmai ba suke yi ga musulmai duk wani abu da ya kasance na zargi to sai ya bi bahasin abun kuma Allah cikin ikon Sa sai ka ga an sami waraka.

Yaɗa sunna ta hanyoyin sadarwa na zamani

Kasancewar sa wayayyen masani, malamin addini, attajiri, ɗan boko ya fahimci cewar irin kiɗan da ake yi na yaƙar al’ummar musulmi a duniya ya canza, domin a wannan lokacin yaƙin da ake yi ba yaƙi ba ne na makami kawai, ana amfani da kafofin watsa labarai da na sadarwar zamani domin tauye haƙƙoki da kuma faɗin maganganu na karya da kuma ƙage ga al’umma.

Sheikh Abdullahi Bala Lau ya kakkafa abubuwa da dama na zamani wanda zai taimaka wurin isar da saƙon Allah da kuma ganin cewar an fahimtar da jama’a abin da yake na gaskiya a cikin wannan addini.

Kafin zuwan Shugaba, babu wata kafa ta zamani koda guda ɗaya da al’umma musulmin wannan ƙasa suka mallaka domin kare martabar addini, amma zuwansa a halin yanzu ya sanya akwai kafofifin yin da’awa sama da guda biyar da suke da’awa zallah ana kuma kallonsu a faɗin duniya ba wai Najeriya ko Afirka kawai ba.

Da farko ya fara ƙoƙarin buɗe shafi ne a Internet inda aka biya kuɗin shekara guda domin ganin ko shafin zai amfanar kamar yadda ake tsammani, ba a cika shekara ba aka samu ci gaba mai yawa, a lokacin ya biya maƙudan kuɗaɗe domin ganin an sabunta gina wannan shafi. A halin yanzu shugaba ya biya kuɗin mallakar sunan shafin da kuma ɗaki mafi girma da sauri a internet har na shekaru goma, wanda zai yi wahala ka sami wani shafi da yake mallakar ƙungiyar addini ce ta biya koda na shekara biyar ne.

Wanann shafi (JIBWIS NIGERIA) wanda ake iya samunsa a tashar http://jibwisnigeria.org ana samun rubutu da sauti da kuma video da harshen Hausa, wanda a ƙarshen shekarar 2015, Shugaba ya sake ganin ya kamata ace wannan ƙungiya tana magana da manyan yarukan duniya domin isar da saƙon Allah. Ya sake biyan maƙuden kuɗaɗe domin ganin an sake fitar da waɗansu shafuka da za su riƙa yin magana da harshen Larabci da Turanci da kuma Faransanci, wanda a halin yanzu a gama gina waɗannan gidaje kuma a na ƙoƙarin fassara abubuwan da suke cikin babban shafin zuwa sauran yarukan.

Daga nan ya sake ƙarfafa wannan tasha ta internet da mallakar shafukan sada zumunta irinsu Facebook da Twitter da WhatsApp da dai makamantansu. Waɗannan shafuka suna isar da saƙon na da’awa da kare ra’ayin addinin musulunci da sunnah baki ɗaya. Waɗannan kafafe a yanzu suna isar da saƙo ga miliyoyin musulman duniya baki ɗaya.

Gidan Talabijin na farko da aka fara yaɗa sunnah a faɗin duniyar nan da harshen Hausa shi ne, Sunna TV wanda wani bawan Allah daga ƙasar Benin Republic ya yi tattaki har zuwa wannan ƙasar domin ya sami bayin Allah jagorori da za su iya lura da wannan gidan talabijin. Allah cikin ikonSa wannan mutumin ya faɗo hannun shugaba kuma Allah Ya taimaki shugaba ya riƙe wannan gidan talabijin ba tare da an sami wata matsala ba.

Daga nan sai ya samu tunatin samar da wata sabuwar kafa wacce za ta riƙa watsa shirye-shiryenta na sauti zalla, inda ya ƙirƙiro da gidan radiyo na intanet mai suna Sunna Redio ko JIBWIS Redio, shi ma wannan gidan rediyo sai da ya biya maƙuden kuɗaɗe domin tsayuwar sa wanda ake iya saurare kowane lokaci ba dare ba rana. Shi ma wannan gidan radiyo ya biya mishi kuɗi har na tsawon shekara goma, baya da kayan aiki na zamani da aka kawo wanda ake turo karatuka da kuma watsa shi daga nan gida Najeriya.

Gina tashar talabijin na Manara Da jami’a ta ƙungiya ta hanyar taimakon kai-da-kai

Bayan da ya fahimci irin matsalolin da al’ummar musulmi suke fama da ita a wannan ƙasa da kuma a wancan lokacin an mayar da taruka da wurin wa’azi wurin tara gidauniya da sunan addini, shugaban da ‘yan majalisarsa suka yi kirari suka daɓa wa kansu wuƙa ba tare da cin maganin ƙarfe ba. Sun furta cewar sun soke duk wani taro da za su kira domin neman a tara kuɗi domin gini ko bunƙasa wani abu. Fahimtar yadda wasu da yawa daga cikin masu kuɗi ba su cika son suna shigowa bainar jama’a su faɗin abin da suka bai wa addini ba, da kuma ganin sau tari idan an tara wannan kuɗi shekara sai ta sake dawowa a sake tarawa ba tare da ganin abun a ƙasa ba.

Abu na farko da ya fara yi shi ne fito da shirin Manara wanda zai haɗa mishi dukkanin masallatan da ake salloli biyar da na juma’a na ƙasar nan baki ɗaya. Wannan shiri yana buƙatar gogaggu sannan ƙwararrun masana harkar kwamfuta da kuma masu ilimin taswira, a inda Allah Ya azurta shi da wasu haziƙan samari suka zo domin tallafa wa wannan tafiya.

Allah cikin ikonSa ba a ɗauki lokaci mai tsawo ba sai da Kungiyar Izala ta san adadin masallatanta gaba ɗaya da suke cikin Najeriya. Daga nan shugaba da ‘yan majalisarsa suka fito da tsarin dogaro da kai ta yadda dukkan wani musulmi da yake wannan ƙasa zai iya taimakawa da kuɗin daga naira ɗari (N100) zuwa dubu goma (N10,000). Kasancewar yasan yadda aka sha jama’a suka warke ya sanya bai ce zai yi amfani da ofishinsa domin tara wannan kudi ba, sai ya naɗa kwamiti da za su lura da shiga da ficen wannan kuɗi.

Bayan da aka buɗe Account a Ja’iz Bank aka samar da waɗanda za su riƙa saka hannu domin fitar kuɗin sanna aka bayar da wa’adin lokacin da za a fara amfani da wannan kuɗi da al’umma za ta riƙa tarawa. Shi shugaba da ‘yan majalisarsa sun daɗe su na jin yadda jama’a suke ƙorafi game da rashin abubuwan more rayuwa suke ganin idan har al’umma zata bada haɗin kai to babu wani abu da zata nema wurin gwamnati ko kuma waɗansu jama’a.

A lokacin da aka fito da wannan tsari an ƙiyasta aƙalla mutane miliyan ɗaya Ahlussunah za su yi rijister da wannan shiri, wanda ake sa rai idan suka yi rijista za’a fara tara aƙalla miliyan ɗari wanda ake sa rai idan mutane miliyan ɗaya suka saka naira dubu ɗaya da ɗari biyu a tsawon shekara guda za a samu aƙalla naira biliyan ɗaya da miliyan ɗari biyu.

Wannan shi ne tunanin da shugaba da ‘yan majajisarsa suka yi, wanda ko a lokacin da Sheikh Abubakar Mahmud Gumi yake da rai da aka so a yi irin wannan shiri ba a taɓa tunanin za a iya samun dabarar haɗa wannan kuɗaɗe ba.

Fara haɗa wannan kuɗi ke da wuya shugaba ya fara gabatar da waɗansu irin aikace-aikace wanda a iya tunanin jama’a ba zai yiwu ba. A farkon shekarar 2014 aka kai gudunmuwar kaya na abinci sama da tirela 10 waɗanda kuɗinsu ya kai sama da Naira Miliyan ɗari biyar.

Duk a cikin irin wannan shiri shugaba ya sami makeken fili a hanyar Kaduna zuwa Zariya a garin Rigachikun inda aka ɗora tubalin ginin babbar jami’a ta farko ta ƙungiya. Haka abin yake daga nan aka fara samar da wurin saukar baƙi a garin Abuja wanda a yanzu haka gini ma har an kammala shi.

Daga nan ya dawo garin Kaduna ya buɗe kamfanin ɗab’i wanda ake kiranshi da Manara Press wanda ya ke printers village a Doka Kaduna an sa injin Cord wada yake buga babbar takarda mai girman A2 wanda a wancan lokacin da aka siya ya haura sama da miliyan goma sha biyu.

Bayan da waɗannan ayyukan suka yi nisa sai Shugaba ya ga ya dace a ce ita ƙungiya ta mallaki gidan talabijin nata na kanta da kuma gidan radiyo. A wannan lokaci ne ya fara tunanin yadda za kafa gidan talabijin da radiyo na Manara wanda Allah cikin ikonSa aka samu gudunmuwa daga ɓangarori mabanbanta domin ganin an samar da wannan babbar tasha ta talabijin da radiyo.

Ana cikin waɗannan sai kuma ya zo da wani shirin da ya tallafa wa mutane kusan ɗari huɗu (400) waɗanda suka rasa ƙafafuwa da hannaye. Sheikh Abdullahi Bala Lau ya sanar da cewar suna yin wannan shiri tare da haɗin gwiwar waɗansu ƙungiyoyi domin ganin an samarwa da waɗannan bayin Allah hannuwa da kafafu wanda wannan shirin tuni an gabatar da ɓangare na farko wanda a yanzu ake kan shirye-shiryen na biyu.

Waɗannan kaɗan kenan daga cikin irin aikace-aikacen alkairi da wannan bawan Allah kuma shugaba jagoran Sunna na Afirka Sheikh Abdullahi Bala Lau yake kan gabatarwa, wanda ba a magana a kan masallatai da ya giggina, da kuɗaɗen makarantu da ake biya, da tallafin abinci da kayan abinci da ake bai wa marayu da gajiyayyu da kuma tallafa wa duk wani matashi mai hazaƙa da ya sami labarin yana buƙatar gudunmuwa domin daurewar ayyukansa. Lallai wannan ba ƙaramin gajiya ba ce ga wannan al’umma.

Gajiyawar al’umma wajen cin gajiyar ayyukan Sheikh Bala Lau

Duk da irin wannan ƙoƙari da wannan shugaban yake yi na ganin jama’ar musulmai sun dogara da kansu har zuwa wannan lokaci akwai jama’a da dama da ba su mayar da hankali ga irin wannan kyakkyawan tsarin ba.

Ni ina ganin samun irin wannan bawan Allah da kuma ‘yan majalisun sa masu alkairi ba ƙaramin nasara ba ce ga wannan al’umma. Domin duk lokacin da aka ce shugaba ba shi da wani abu a zuciyarsa sai yadda zai ga ya sauke nauyin da ya rataya a kansa, kuma shugaba wanda ba shi da girman kai, ba shi da kyama, ba shi da damuwa ai abin da yake buƙata abu biyu ne, na farko taya shi da addu’a, na biyu kuwa taimaka masa da gudunmuwa kowace iri ce da zai san ya aikace-aikacen da yake son yi su tabbata.

Al’ummar Ahlussunnah sun nuna gajiyawarsu ga irin waɗannan ayyukan alkairi da wannan shugaba ya ke gabatarwa, idan muka ɗauki mas’ala guda zamu ga cewar da mun riƙe Manara Project wanda shi kati kawai ake siya da mun yi abubuwan ban mamaki.

Kullum muna ƙorafin cewar ba mu da babban asibiti amma kuma ga shi an fito da yadda za mu gina abin da ya fi asibiti amma kuma babu wanda ya mayar da hankalinsa a kai. Muna da matsalar jami’a ta mata zalla, idan muka riƙe Manara Project kawai kafin shekara biyar da yardar Allah za mu gina katafariyar jami’a ta mata zallah.

Na tabbatar Ahlussunnah da suke Arewacin Najeriya sun wuce miliyan 40 wanda idan da za mu ɗauki wannan hanya ta Manara Project kawai kafin shekara ɗaya za mu samar da kuɗi Naira Biliyan Arba’in da Takwas. Idan kuwa har muka tara wannan kuɗi, maganar yadda za a shiga garuruwa domin gabatar da wa’azi, tura malamai ƙauyuka da ɗaukan ɗawainiyar iyalansu duk an wuce wurin, ba a maganar samar da gidajen kula da marayu da marasa galihu.

Idan muka ɗauki wannan Project na Shekara biyar kawai muna da kuɗin da musulmai sun fi ƙarfin wulaƙanci. Amma gaskiya mun gaza. Domin za ka samu lokacin da wannan shugaba ya bayar da sanarwar cewar da Sallar Layya da ta gabata aka ce ana buƙatar kowa ya bayar da fata, sai da aka sa mu wasu da suke da’awar sunnah suma sun ce suna buƙatar wannan fatu a masallatansu.

Ina fatan wanann dogon tsokaci da na yi a kan wannan bawan Allah zai sa mutane su fahimci kyawawan ƙudurori na Shugaba Abdullahi Bala Lau, da kuma shin muna cin gajiyarsa kamar yadda ya kamata ko kuma mun nuna gajiyawarmu.

Haƙiƙa ba mu bada wata shaida a kan shi ba, sai da abin da muka sani, sannan kuma a kan abin da yake a ɓoye mu bamu zamanto masu sanin gaibi ba.

Allah Ya yi wa Sheikh Abdullahi Bala Lau jagora da ƙara masa lafiya da kuma ƙara taimakonsa da ‘yan majisalisar sa, da dukkanin Malamanmu na Sunna, Ya kuma gafartawa dukkanin musulmi maza da mata yara da manya. Idan tamu tazo Allah Ya sa mu cika da imani amin.

Categories
Hannunka mai sanda

Ga Amsoshin Jarabawar JAMB 2016

Yana ɗaya daga cikin abubuwan da suka sanya ni in bayar da waɗannan amsoshi ba domin komai ba sai domin in taimakawa al’ummata don ta sami nasarar lashe wannan jarabawa ta JAMB wacce ake son fara ta nan da ‘yan kwanaki masu zuwa, amma dai ina bukatar Naira Dubu Daya kacal a wurinku. Wannan shi ne abin da naji wani mutum yana faɗawa waɗansu yara waɗanda suke son su rubuta jarabawar JAMB  wacce ake amfani da kwamfuta wurin rututa ta wato (Computer Based Test).

Wannan zance hankalina bai kawo gare shi ba, sai bayan da na ke samun saƙwanni ta hanyoyi mabanbanta ana roƙo na ni ma idan har ina da wata hanya da zan taimaka to in taimaki al’umma tunda wani yanzu haka yana ƙoƙarin rubuta jarabawar ta wurin Huɗu ko Biyar, amma kuma bai sami sakamakon da yake buƙata ba.

To, gaskiya jama’a ina son mu sani cewar garɓatattun mutane za su iya sato takardun jarabawa a ofishi JAMB ko kuma a hada baki da ma’aikatan da suke ajiyar waɗannan takardu su kwaso su rabawa mutane da kudi mai tsada.

Waɗannan mutane da muke gani, suna daga cikin mutanen da suka sanya darajar ilimi da kuma mayar da hankali domin fahimtar karatu ta yi karanci a wurin mu, musamman ‘yan Arewa kasancear tun Fil-Azal ɗan Arewa bai san wani abu satan amsa ba, ba mu da wannan dabi’a ba mu santa ba, sai bayan da muka fara samun makarantu masu zaman kansu waɗanda ake musu laƙabi da Miracle Center wato makarantu waɗanda idan ka rubuta jarabawa a cikinsu, to tabbas za ka sami sakamako mai kyau.

Wannan ya kawo tawaya a wurin dalibai da suke yin karatu a kowane ɓangare da ke cikin wannan yanki na mu na Arewa. Dalilin haka ya sanya tun daga Sakandare za ka samu yara suna faɗa maka cewar ai duk karatunka sai ka nemi satan amsa ko kuma malamai sai sun taimaka maka kafin ka sami fitowa da sakamako na gari. Haka idan dalibi yana karatu a Jami’a ko a wata babbar kwaleji za ka samu ɗalibai sun fi amanna da cewar duk wanda ya ke matsawa a yi karatu kuma a gane, shi ne mugun malami, wanda kuma zai cewa duk wanda ya sayi littafinsa ko ya ganshi da ‘yan tamame to shi ne zai samu maki mai yawa. Waɗansu malamai ma za su faɗa muku cewar za su baiwa dalibai kaza Carry Over, dai dai irin malamai da suke saka dalibai su ga cewar mayar da hankali wurin yin karatu ba shi da wani muhimmanci, iya kuɗinka iya shagalinka.

To a  wurin rubuta jarabawa ta hanyar kwamfuta waato (CBT) kada wani ya yaudareku, domin an fito da irin wannan tsarin ne domin ganin an kaucewa duk wata hanya da dalibai za su bi domin satan amsa. Da kuma ganin dalibai sun mayar da hankali sosai domin fahimtar karatu mai inganci.

SHI ANA IYA BAKA AMSAR JARABAWA TA KWAMFUTA?

A gaskiya kamar yadda na ambata a farko cewar wannan abu ba zai yiwuba, haka abin yake, domin yadda aka tsara kwamfuta ta riƙa fito da tambayoyi da amsoshi ba kamar yadda ake amfani da takardu ba ne wurin shirya jarabawa.

Duk mutumin da ya san yadda ake amfani da kwamfuta ake yin walan-keluwa da rubutu ya san cewar a rina wai an yi yamma da Kare. Domin idan aka ce an sami dalibai dubu ɗaya sun biya kuɗi domin rubuta jarabawa to ita hukumar dake lura da wannan jarabawar zata bi duk wata hanya domin ganin an kiyaye waɗannan jarabawar ba tare da an sami bayyanar amsar ba kafin ranar, shi yasa wani lokaci sai ka samu hukuma ta shirya jarawaba mabanbanta domin magance irin wannan matsalar.

Amma a kwamfuta yadda aka shirya jarawabar ya canza daga yadda mutane suka sani, domin idan mutum dubu za su rubuta jarabawa a cikin darussa hudu, misali Ingilishi da Lissafa da Tsimi da Tanadi da Hausa, shi Ingilishi za a bashi tambayoyi guda ɗari, sauran kuma a basu tambayoyi guda hamsin waɗanda yake nuna kowane mai rubuta jarabawar zai amsa tambayoyi guda dari biyu da hamsin.

To idan aka tashi shigar da tambayoyin za a shigarwa da Ingilishi kamar tambayoyi ɗari biyar ko fiye da  haka, haka suma sauran darussan za a shigar musu da tambayoyin wanda zai kasance za a iya samun tambayoyi kamar dubu ko fiye da haka ga kowane dalibi zai amsa.

Wani zai iya faɗin cewake nan duk wanda shi ne ya shigar da tambayoyin a cikin kwamfutar, misali ma’aikatan hukumar, ke nan yasan amsoshin tambayoyin da za su fito, saboda haka idan na sanshi zai iya ba da amsar tambayoyin da ake bukatar su. Wannan ba haka yake ba, domin dalilin sanya waɗanda nan tambayoyi masu yawa, domin ita wannan jaraba da ake amfani da kwamfuta wurin rubuta ta, ita kwamfutar ce take zaɓar tambayar da za ta fito a daidai lokacin da kake ƙoƙarin rubuta jarabawar.

Misali da za a samu a cikin ɗakin jarabawa a sami mutane ɗari da zasu rubuta jarawa ta hanyar kwamfuta, to duk su ɗarin nan babu wanda tambayar shi za ta yi daidai da ta ɗan uwansa, zai kasance idan dukkan su a lokacin za su rubuta jarabawar Lissafi ne, za ka samu tambayoyin duk an jirkita su, wanda ya ke kan kwamfuta ta farko wataƙila tambaya ta ɗari uku ce a matsayin ta farko a ta shi kwamfutar, wanda kuma ya ke kwamfuta ta sittin wataƙila tambaya ta ɗaya ce a tashi kwamfuta.

Kuma wani abin mamaki da wannan jarabawa ta kwamfuta ita ke sanya lambobi a jikin kowace tambaya, a lokacin da ka ga tambaya ta ɗaya a cikin kwamfutarka haka shima an rubuta tambaya ɗaya ne a cikin kwamfutar sauran, sai dai dukkanku tambayoyinku sun banbanta.

Kuma wani abin mamaki shi ne, ita kwamfutar tana sauya mazaunin amsoshin kowace tambaya. Misali idan wanda ya tsara jarabawar ya zaɓi amsar tambaya ta farko shi ne harafin (A) to ita kwamfutar za ta iya canzawa zuwa (C) ko kuma sabanin haka, amma kuma amsar daidai ne. Saboda haka, koda an yi sa a an samu a cikin dakin jarabawa, tambaya ta goma ta yi daidai da kwamfutoci biyar to yadda abin zai kasance shi ne, zai iya yuwuwa a kwamfuta ta farko amsar ta kasance (A) na biyu (D) na uku (B) na hudu (E) na biyar (C), wanda idan muka lura babu yadda za ayi wani ya iya baka amsa.

MENE NE ABIN YI?

Gaskiya abin yi shi ne mu ƙara yin karatu, sosai da sosai, mu sani cewar wannan ɗabi’ar ta ƙoƙarin cin jarabawa ta hanyar satan amsa ita ce hanya mafi sharri da lalacewar al’ummar mu, idan muka saurari yadda iyayenmu da kakanninmu suke yin turanci, irin su Sardaunan Sokoto, Tafawa Balewa, Maitama Sule, Farfesa Ango Abdullahi da dai makamantansu za mu tabbatar cewar ba satan amsa suka yi ba. Mu duba tarihi irin sakamakon da iyayenmu suke fita da shi da kuma irin yadda suka mayar da karatu ya zama dabi’unsu shi yasa suka zama fice a cikin abin da suke nema.

Wannan shi ne satan amsa da zan bamu na wannan jaraba ta JAMB, da cewar Allah Ya bada sa a kuma ina kira ga ɗalibai ‘yan uwana da su mayar da hankali lokacin da suke yin karatu da kuma sanya kwazo a cikin darrusanmu.

ABUBUWAN KIYAYEWA LOKACIN RUBUTA JARABAWAR

  • Abu na farko shi ne ka rubuta Jamb Registration Number dinka.
  • Duk abin da ka gani sabanin abin da yake naka ne, ko ka yi kuskure kada ka fara bada amsa, sai ka nemi agaji daga wakilan JAMB na wannan center din.
  • Ka sani cewar ana bayar da awanni uku ne domin amsa dukkan jarabawar. Ba kamar yadda wadansu ke tsammanin cewar kowane darasi ana bashi awa uku bane.
  • Darasin Use of English yana da tambayoyi ɗari, sauran darussan uku suna da tambayoyi hamsin – hamsin.
  • Ba a son ka bata minti daya wurin amsa kowane tambya domin yin haka zai sa ka manta kasa amsa tambayoyin saba’in
  • Ana amfani da browser wurin amsa wannan tambayoyin wanda yake nuna ba zaka iya amfani da maballin Next ko Back ko Referesh ba.
  • Ba dole sai ka fara amsa tambayoyin darasin farko ba, zaka ita shiga darasin da ka fi ganin ka fi saninsu kafin ka shiga masu wahala.
  • Duk tambayar da baka santa ba, kada ka yi shaci-faɗi wurin bayar da amsarta, za ka iya wuce ta gabanta, bayan ka gama amsa dukkan tambayin sai ka dawo baya wurin wadanda baka amsa su ba ka sake dubawa idan akwai sauran lokaci.
  • Duk tambayar da ka amsa ta zata saka maka alamar ruwan Ganye, wacce kuma ka tsallake ta zata nuna maka alamar ruwan lemu.
  • Bayan ka kammala komai sai ka taba maballin finish wanda ya ke nuna cewer lallai ka kammala wannan jarabawa.
  • Kada a manta da yin addu’a domin neman taimako daga Mahallici, a kuma dage da nazari.

Allah Ya basa nasara, amin.

Categories
Hannunka mai sanda

ZUWA GA GWAMNA MASARI (2)

Cigaba daga Mukalarmu ta farko Zuwa Ga Gwamna Masari (1)

Jihar Katsina, jiharmu ce mu duka, lalacewar ta da ci gaban ta, namu ne mu duka. Lokaci ya yi da za mu mayar da hankali kan warware mata matsalolinta da sake lalubo matakan da suka dace domin tayar da komadar ci gaban nata. Yanzu ba lokacin da shugabanni za su tsaya wasa da hankalin talakawa ba ne. Kan mage ya waye! Canji ya samu.

Kenan dole ne a nemar wa jihar Katsina hakkinta. Dole ne mutanen Jihar Katsina (kowa da kowa) su mike domin inganta da ciyar da jihar Katsina gaba. A dage domin yi wa al’umma aiki, a kuma tabbata an zauna don yin daunin da ya dace da kowane yanki na Jihar Katsina. A tabbata ana bin diddigin yadda ake sarrafa dukiyar mutane. A sami wasu daga cikin al’ummar jihar ta Katsina, kamar yadda na fada a baya da za su dinga nuni da inda ake barna domin a gyara.

Ya Mai Girma, abin da muke fada a kullum shi ne mu tsaya tsayin daka mu fahimci yadda mulki ya kamata ya gudana. Kowa na da irin gudunmuwar da zai iya bayar wa, tun daga Gwamna har zuwa talakawa. Mu zauna domin tsara yadda mulki zai gudana, domin taimakon kai da kai.

Saboda haka ya Gwamna, ina ya ga ya dace a samar da wani tsari a jihar tamu da za a yi amfani da shi domin a tabbata aiki na gudana yadda ake so. Halin da ake ciki na ruruta da bayyana rashin katabus da aka tafka a baya, musamman a zamanin Gwamnatin Shema ya isa haka nan. An dai yi kokawa, kuma ya Mai Girma, ai ka yi kaye, lokaci ya yi da za a motsa zuwa gaba. Matsalarmu a yau ba ta tsohon Gwamna Shema ba ce, ta inda za mu dosa ne daga inda ya tsaya. Me za mu yi? Yaya za mu yi? Muna da kudaden da za su taimaka mana wajen ganin mun yi abin da ya dace? Kudaden shiga sun ishe mu? Idan ba su isa ba, ina za mu kwakwulo wasu don raya jihar ta Katsina? Wadannan tambayoyi da wasu irin su, ina jin su ne ya kamata mu mayar da hankali kai. Ta tsohon Gwamna Shema ta kare, yanzu ta Gwamna Masari ake yi! Me aka shirya wa al’ummar jihar Katsina?

Nan ne zan fara da jefo tawa gudunmuwar. Ya Mai Girma, daga bayanan da kake ta kururutawa game da abin da aka yi a baya a wancan Gwamnati ta Shema sai mutum ya dauka cewa ba aikin ci gaba ko daya da Gwamnatin Shema ta yi a jihar Katsina, sai facaka da almundahana, wanda na san ba haka kake nufi ba, tun da lokacin kamfen ya wuce, an kuma zabe ka.

Wani abu da na gani shi ne tamkar kwasan karar mahaukaciya ake neman yi wa matsalolin jihar Katsina, alhali ina ga dauki daidai zai fi alfanu. Ya Mai Girma, a maimakon a ce sai an taba kowane fanni na rayuwar al’umma da ya dagule, me zai hana a dubi matsala guda a hau kanta a dinga dirza har sai ta yi laushi, sa’annan a koma kan wata. Me ya sa gwamnati za ta fi mayar da hankali wajen shan kandamau, inda abin da ake bukata shi ne sha ludayi-ludayi? Al’amurran ilimi na cikin tasku! Hanyoyinmu sun bulbulguce! Ingantaccen ruwan sha ya fara gagarar mu! Talauci ya yi wa yawancin mu katutu! Sata da almundahana a kowane fanni na rayuwa sun kusa zama ruwan dare! Ayyukan noma sai kokawa suke yi! Kiwon lafiya shi kan sa ba shi da lafiyar! Siyasa da mulki da zamantakewa na kewar masu kulawa! Duk ga su nan birjik!Bisa irin wannan fasali, shin ana ga kandamau zai biya? Ko alama!

Dangane da haka nake ganin ya dace a ce cikin wata uku da dori da aka yi an san inda aka nufa. Jama’ar jihar Katsina su san cewa akwai gwamnatin Aminu Bello Masari, ba gwamnati mai yekuwar gwamnatin Ibrahim Shehu Shema ta gaza ba. Ba wai nufina ba ne na ce ba wani abu sabo da gwamnatinka ta yi wa al’ummar jihar Katsina tun hawanta karaga ba ko alama, amma dabashirin ciyar da jihar Katsina gaba ne ban gani ko na ji ba a cikin tsawon lokacin da aka hau karagar mulki.

Ba wani abu ya sa na fadi haka ba sai ganin cewa tsari da tabbatuwar tsari da kuma hangen nesa da ingantaccen dabashiri wajen aiwatarwa su ne ke jan ragamar cigaba. Ke nan abin da ake bukata a jihar Katsina a halin yanzu shi ne a san inda aka sa gaba domin yin aiki gadan-gadan, a kuma lura da bin tafarkin da yake shi ne zai fitar da A’i daga rogo. Me ya kamata a yi a wannan fasali?

Dole ne a bayyana wa mutane halin da ake ciki da kuma abin da aka shirya za a yi. Abin jin dadi shi ne ya Mai Girma, an somo da haka. An bayyana halin da jiya ta kasance, saura yau da kuma gobe. Wato dai ga cuta, saura magani.

Abin da ka bayyana a wajen taron da ka yi da masana da dattawan jihar Katsina bayan kwana 100 da hawanka mulki abin da aka saba ji ne kullum daga kowace irin gwamnati da aka yi a baya. Kowace shekara ai batun ke nan, za a inganta harkokin ilmi. Za a biya wa dalibai kudaden makaranta. Za a gina azuzuwan makarantu. Za a samar da takin zamani. Za a gina hanyoyi a birane da karkara. Za a kawar da talauci. Za a samar da ruwan sha. Za a samar da motocin shiga don inganta sufuri. Za a samar da aikin yi, za a….! Ba iyaka.

Amma kullum tambayar da al’umma ke yi shekara bayan shekara ita ce shin an samar da wadannan abubuwa ko dai kawai ana babarodo ne? Shi ya sa yake da kyau a fahimci lamurra da kyau kafin a dora dan ba. Dole ne idan ana son aikin gaskiya, a bayyana wa mutane abin da za a yi da yadda za a yi, da inda za a samar da kudaden yin abubuwan, a lokaci guda, a kuma gani a kasa a lokacin gudanarwa.

Za Mu Ci Gaba

Categories
Hannunka mai sanda

ZUWA GA GWAMNA MASARI (1)

Na bi wannan mataki ne domin na bayyana abubuwan da ke makure a cikin zuciyata game da dan bar da aka dora na gudanar da mulki a Jihar Katsina. Na kuma soma kokawa ne tun kafin tafiyar ta yi nisa saboda a sa wa tayoyin motar tafiya iska a kuma tabbata an sa wa notocin motar giris, don jin dadin tafiya.

Mai girma Gwamna, wadannan batutuwa da zan zazzage a nan, su ne muka zazzagawa wa tsohon Gwamna Shema lokacin yana kan mulki, amma canjin da muke tsammani bai samu ba har ka hau karaga. Abin da kawai zan yi a nan shi ne cire duk inda sunan Gwamna Sheme ya fito in maye shi da naka, domin mu ga ko canjin da aka yi mana alkawari zai samu kamar yadda yawancin mu ke bukata.

Ya mai girma Gwamna, ranar litinin, wato 28 ga watan Mayu 2012, na yi bikin cika shekara daya na samun ganawa da Gwamna Ibrahim Shehu Shema na jihar Katsina ta fuskar yin irin wannan rubutu, ganawa irin wadda ka yi da dattawa da kuma wasu daga cikin masu fada a ji a jihar Katsina ranar Asabar 12 ga watan Satumba, 2015. Ita wancan ganawa da Gwamna Shema, tamkar irin taka ganawar ce, ita ma Gwamna Shema ya nemi ganawa ne da duk wasu masana da suka samu kai koluluwar karatunsu na zamani, wato masu digirin digirgir da kuma Farfesoshi, ‘yan jihar Katsina. An yi wannan ganawa ce a Jami’ar Umaru Musa ‘Yar’adua da ke Katsina bayan laccar da aka gabatar domin bikin hawan Gwamna Shema bisa karagar mulkin jihar a karo na biyu. Ita kan ta laccar da Mai Shari’a Umaru Abdullahi ya gabatar, abin tunawa ce, abin tinkaho ce, domin kuwa ta nuna cewa Gwamna Shema zai iya tattara mutane domin su ba shi shawara, ya kuma saurari mai dadi ko masar dadi. Wannan shi ne kila ya sa mani kwarin gwiwar da ta sa na amince in halarci taron ganawar da Gwamnan a kebance ba tare da hayaniyar sauran jama’a ko ‘yan jarida ba.

Amma duk wadannan abubuwa ba su ne makasudin yin wannan sharhi ba a yau. Niyyata a yau ita ce na kwance jakar da nake dauke da ita tun samun waccan damar ganawar da muka yi da Gwamna Shema, a shekarar 2011. Jaka ce da ke dauke da batutuwa da nake ganin za su yi mana jagora wajen kara fahimtar yadda gwamnati ke gudana da yadda sauran mutane da ke kusa da gwamnatin ke mu’amula da ita da ma kuma yadda wadanda ke nesa da ita ke mata kallon kitsen rogo da kuma uwa-uba yadda shi talakan ke faman kasancewa talaka duk da cewa wai shi ake wa mulki ko kuma in ce shi ake mulka.

Abin da ya burge ni a lokacin waccan ganawa da Gwamna Shema shi ne yadda Gwamna ya gayyaci masanan jihar Katsinar, aka kuma zauna, zama irin na gurguzun al’umma, ba Sarki balle Talaka domin a fahimci juna, a kuma ba juna shawara kan yaya za a ciyar da jihar Katsina gaba. Gwamna Shema ya gaya wa Daktoci da Farfesoshin jihar Katsina cewa, ya tara su ne domin a gaya masa inda ya yi kuskure a baya domin ya gyara, a kuma bayyana masa inda ake neman a mayar da hankali a gaba, domin a nazarta, a kuma kokarta jan akalar aiki zuwa can.

Shawarwarin da aka bayar ba za su kasaftu a nan ba, amma duk da haka Gwamna Shema ya saurari duk wanda ya ba da gudunmuwar yadda yake ko take son a tunkari lamurra.

Wasu gudunmuwar tasu ta gina kasa ce, wasu kuma domin gina kai da kai ne. Amsoshin da Gwamna Shema ya bayar da alkawurran da ya yi su ma abin dubawa ne, ba kuma inda ya fi birge ni irin shan alwashin da ya yi na tabbatar da zai yi aiki da shawarwarin da aka ba shi.

Ba zan iya kawo dukkan shawarwarin da aka ba shi ba, da kuma yadda ya yi alkawarin shawo kan matsalolin ba, amma zan mayar da hankali kan shawarwarin da ni da irina muka bayar da kuma irin alkawarin da Gwamna Shema ya yi game da su, domin a gane yadda ake tufka da warwara a fagen mulki, kila ta haka a tsinci dame a kala a lokacin gudanar da naka mulki yanzu.

Abu na farko shi ne alakar da ke tsakanin Shugabanni da Talakawa da kuma fafutikar zaman lafiya. Ni a nawa ganin kamar yadda na bayyana, ba yadda za a yi a samar da ingantaccen zaman lafiya sai in shugabanni da mabiya sun canza hali game da sha’anin mulki. Ba wani abu ya jawo matsalar da ake cin karo da ita a halin yanzu ba, sai lalacewa da tabarbarewar sha’anin mulki. Hanyar da nake ganin za a samar da zaman lafiya shi ne masu mulki su kusanci talakawa, su bar warewa can gefe suna kyamar wadanda suka zabe su. Idan suka yi haka, suka kuma inganta mulki da yin aikin kwarai, aka kuma samu wasu daga cikin al’umma da ke nuna wa shugabanni inda suka kauce, ba da son rai ko neman abin duniya ba, to za a samu zaman lafiya a tsakanin al’umma. Dole ne idan ana neman zaman lafiya da raya kasa a samu masu kururuwa game da cin hanci da almundahana da lalacewar lamurran mulki a kowane fanni na rayuwa.

Categories
Hannunka mai sanda

AN KUWA SAMU CANJIN? (1)

Kila kafin mutum ya amsa wannan tambaya, abin da ya dace ya fara aunawa shi ne, mene ne canjin da ake nema tukunna? Canjin mulki daga wata jam’iyya zuwa wata ko daga wani mutum zuwa wani? Ko kuwa canjin lamurran rayuwa daga lalatattu zuwa kyawawa? Ko canji daga tsofaffin yanaye-yanayen rayuwa zuwa ga sababbi? Ko kuwa dai canji daga munanan halaye zuwa ingantattu, domin samun ci gaba? Idan ba wadannan ake bukata ba, to ko kuwa dai canjin da ake sa ran gani shi ne na daga tsarin mulkin danniya da babakere zuwa ga na salama? Ko kuwa wane irin canjin ne ake magana?

A Nijeriya dai tun daga lokacin da aka kada kugen siyasa da neman kuri’a, canjin da ake ta kururutawa bai wuce na abubuwa uku ba:

  1. Canjin siyasar da ke mulki, wato PDP zuwa wata daban, musamman APC.
  2. Canjin tsarin mulkin da aka kwana ana ta yi tun daga 1999 zuwa yau, wanda bisa ga dukkan alamu, bai yi wa yawancin al’ummar kasar dadi ba.
  3. Canza halayen al’ummar kasar na cin hanci da rashin bin doka da oda da yin awon gaba da muggan halaye da ke wa cigaban kasar nan tarnaki a cikin tsawon zamani.

Idan aka yi la’akari da abubuwan da suka faru a cikin mako biyu da suka wuce za mu iya cewa ba ko tantama an samu canji, don ko ba komi an kayar da jam’iyyar da ke mulki ta PDP a zaben shugaban kasa da na majalisun tarayya, wanda kuma shi ne yawancin al’ummar kasar nan suka dinga zugugutawa da nema a cikin watannin da suka wuce, sai dai kila ba nan ne canjin ya kamata ya tsaya ba, bisa la’akari da nau’o’in canjin da muka lissafo a sama.

Abin da kila ya rage shi ne canji a salon mulki da tsarin manufofin tattalin arziki da siyasa da zamantakewa, wanda shi kuma bai samuwa har sai gwamnatin Buhari ta hau mulki daga ranar 29 ga watan Mayu, 2015. Kenan, ba za a ga wani haske ba a wannan bangare har sai mai wuka da nama ya kama aiki, rigi-rigi.

Shi kuwa canji na munanan halayen al’ummar kasa da ya zame wa kasar kadangaren bakin tulu a tsawon shekaru, ya kamata a ce mun fara ganin sonsomin sa tun yanzu, ba wai nan gaba ba. Me ya sa?

Mu dubi batun da kyau. Cin hanci da almundahana a tsakanin yawancin ma’aikatan gwamnati a kowane mataki a cikin kasar nan, ba abu ne da sai an jira Buhari ya hau karaga ba, in da gaske muke na neman canjin. Haka kuma rashin bin doka da oda, ba na tsammanin sai mun jira Buhari da mukarrabansa sun zaune kujerar Aso Rock za mu ga canji.

Haka sauran muggan halaye da suka hada da sata da fashi da makami da karuwanci da luwadanci da tauye awo da cin yadi a wajen madunka da satar jarabawa a wajen dalibai da sayar da maki daga malamai da gulma da zunde da ashararanci da banga da shan kwaya da sauran abubuwa irin wadannan ba na tsammanin muna jiran sai Buhari ya hau ne, ya yi doka, sa’annan canji a wannan bangare zai tabbata a cikin kasa.

Daga wannan hasashe za mu iya cewa canjin da ke da muhimmanci ya samu a cikin kasar nan, Buhari ya ci zabe, amma canjin da ya fi wannan muhimmanci, na gyara lamurran kasa da inganta ta da ciyar da ita gaba ba na Buharin ba ne kawai, ba kuma sai an jira Buhari ya haye bisa karagar mulki ba. Abu ne da ni da kai da ku da su, mu duka baki daya za mu iya kawo shi domin daidaita lamurra. Ta yaya?

Me ya sa da Buhari ya ci zabe darajar kasuwancin hannun jari ta karu, ta yi armashi har ta kai matsayin da aka dade ba a ga irin sa ba a tsawon zamani? Buhari ne ya ce wa kasuwar ta gyaru ko ta ingantu? Ko alama, kanshin canjin ne da kasuwar ta ji, ya sa ta farfado. To za ta kara ingantuwa da bunkasa idan ‘yan kasuwar sun yi abin da ya dace, ban da shigo wa kasuwar ta bayan fage da zurmuke da saye da sayarwar karya don samun kazamar riba. Kenan canjin a fagen kasuwancin hannun jari da tattalin arziki zai iya samuwa kafin Buhari ya kai ga hayewa kujerar mulki.

Haka kuma da darajar Naira ta inganta bayan ta yi faduwar rimi, shi ma ai ba a ko fara mulkin Buharin ba, me ya nuna mana kenan? Sai fa cewa ai dukkan lalacewar lamurra na hannun ‘yan Nijeriya, in har gwamnati mai ci na da laifi, to ‘yan kasuwar mu da masu kula da lamurran tattalin arzikinmu, su ma suna cikin lalacewar dumu-dumu. Shin su wa suka saye dala suka boye kafin zaben Buhari, gwamnatin PDP? Ko alama, mu din ne dai da muggan halayenmu na ko-in-kula da kuma halin dan kaza da suka yi mana katutu, mu ke da laifi. Shi ya sa bayan Buhari ya ci zabe, ba wanda ya ce mana kanzil, sai ga shi mun fiddo dalolin da muka kimshe a gidaje, nan take darajar Naira ta daga a ‘yan kwanakin nan. Kenan muna da hannu wajen lalacewar lamurra. Ba Buhari ne canji ba. Buhari zai kasance ne kurum a matsayin madafar da za a dafa don ci gaba daga inda ake.

Me ke nan ya dace a ce yanzu ana yi ko za a iya yi domin kawo canji na hakika a cikin kasa, har kafin jagoran canjin ya hau?

Za mu ci gaba.

Categories
Hannunka mai sanda

ABUBUWAN DA BUHARI YA KE BUKATARSU A YANZU

Lallai nasan mutane da dama burin su ya cika na ganin cewar Muhammadu Buhari ya zama zababben shugaban kasar Najeriya.

Wannan wani budi ne daga Allah madaukakin sarki, kuma wannan nasara ba ta mutanen Arewacin Najeriyar ba ne, sai dai na mutanen Najeriya ne baki daya.

Amma kuma duk mutumin da Allah Ya bashi mulki a hannnunsa, ba bu abin da yake son illa a taya shi da Addu’o’i ta kowace fuska. Duk lokacin da na ga cewar saura ‘yan kwanaki ayi zaben shugaban kasa, abin da nake kokarin rokon Allah shine Allah kada ya jarabe mu da abubuwan da malamai su ka hango zai iya faruwa sakamakon tsayuwar GMB da GEJ.

Amma da yake Allah – Allah ne, baya shawara da kowa kuma tun kafin yayi dunya ya hukunta cewar za ayi zabe 2015 a 28 ga watan Maris kuma za ayi lafiya a gama lafiya.

Mutane da dama sun tsayu cikin dare suna rokon Allah Ya saukaka mana a cikin wannan zabe kuma Allah Ya saukaka. Sai dai ‘yar nune ta nuna, tun kafin hukumar INEC ta fadi cewar Janar Muhammadu Buhari ya ci zabe, tuni wadansu suka bakunci lahira, ta hanyar yin wawta da abubuwan hawa. Wannan yake nuna cewar da Allah Ya kaddara ba GMB ba ne ya ci wannan zabe, ko shakka bana yi, wadannan yara sune wadanda za su kawo hargitsi da tarnaki a cikin garuruwansu.

Irin wannan maganar ce, dayawa daga cikin mutane ba sa so, kuma itace gaskiya, kuma ita gaskiya bata bukatar ado ko kuma salo. Akwai abubuwa da yawa da suka faru bayan wannan zabe wanda ya tabbatar mana da cewar da ba Janar ba ne, to, da mutane da yawa da an aikasu Lahira.

ME BUHARI YAKE BUKATA

Kun san ita siyasa mugun wasace, kowa da ka sani yana da manufa a cikin rayuwarsa. Wasu wannan nasara da aka samu, sun tabbatar karshen zaluncinsu ya zo karshe, wasu kuma kakarsu ce suke ganin ta yanke saka.

Akwai masu boyayyiyar manufa kuma suna tare da shi wannan mutumin, kuma ban da Allah babu wanda ya san wace irin manuface, kamar yadda lokacin da shugabancin kasar ya dawo Arewa ashe akwai boyayyiyar manufa ba mu sani ba sai kawai muga tsinci kanmu a kashe-kashe da tashe-tashen bama-bamai.

Wasu sabbabin Addu’o’i za mu koma kuma muna yiwa wannan bawan Allah, kamar yadda shi da ya fi sanin irin hakki da Allah Ya daura mishi yayi wuf ya wuce kasa mai tsarki, domin neman gafarar Allah saboda abin da ya yi a lokacin neman zabe, tun da daman yaki dan zamba ne. To mun fayi zamba har da rawar banjo kafin su amince cewar nawan ba mai ra’ayin rikau bane.

Addu’ar tsawon rai, da koshin lafiya, da kuma Allah Ya tabbatar da shi akan abin da shi Allah Ya ke so kuma Ya yarda da Shi kai ya ke bukatar mu ta roko.

Dukkanin wani makirci da ake kullawa a cikin dare da rana, a sarari da boye, a kusa da nesa, Allah Ya tsare shi. Na ragowar kanakin da ya rage a rantsar da shi da bayan rantsar da shi, Allah Ta’ala ya wargaza su.

Yana bukatar yi mishi addu’ar abota da mutanen kwarai, Mu yi mishi addu’ar Allah Ya kusanto da wanda ya ke nesa da shi amma kuma alheri ne a tafiyarsa. Ya kuma nisantar da duk wanda yake mugu ne kuma munafiki ne dake jikinsa, nisannisan Sammai da kassai.

Yana bukatar mu taya shi rokon Allah ya bashi ikon sauke nauyin da ke kansa, ya shinfida Adalci ga kowa da kowa. Musulmi da Kirista da ma wadanda suka ce basu da Addini. Ya bashi hakuri da irin cutarwar da mu za mu yi mishi.

Idan kai mai son Janar Buhari ne, to ka yi kokarin yin wadannan abubuwa domin samun sauki, da nasara a gare shi.

Allah ka amsa bukatun mu, ka kuma warware mana matsalolinmu, ka yafe kurakuranmu, ka karfafe mu, ka nauyaya mizaninmu, ka haskaka al’amuranmu, ka yalwata mana arzikinmu, ka gafartawa iyayenmu da ‘yan uwanmu da malamanmu, da sauran al’umma baki daya, ka kara salati da aminci ga Annabinka Muhammud Sallalahu Alaihi Wa Sallam, da Iyalansa da Matayensa, da Sahabbansa da wadanda suka bishi da gaskiya har zuwa ranar kiyama amin.

 

Categories
Hannunka mai sanda

Janar Aliyu Gusau: GWARZON TALLAFAWA AL’UMMA

Wannan shine gaban makarantar Legacy Computer Institute tare da Library ta Aliyu Mohammed
Wannan shine gaban makarantar Legacy Computer Institute tare da Library ta Aliyu Mohammed

A waccan mujalla da ta gabata mun yi alƙawarin kowane ffitowa za mu riƙa kawo tsokaci na musamman a kan waɗansu mutane da suka bayar da gudunmuwa domin ci gaban al’umma. Mujallar Duniyar Computer ba ta yi ƙasa a gwiwa ba, domin a wannan fitowar ta zaƙulo muku wani bawan Allah wanda mutane suka sansa a wani fage na musamman da matsayi har suna ganin cewar ai ya yi nisa da mutane saboda haka ma ba a ma tunanin cewar za a sami eata alaƙa ta taimakawa tsakaninsa da al’umma, akasin wancan tunani sai ga shi mu kuma muka duba muka ga ashe wannan bawan Allah yana kusa da mutane da kuma yana taimaka musu ta fannoni da dama.
A karon farko mun yi nazari mai zurfi a kan shin wa ya kamata mu fara da shi, kasancewar dukkan wanda wannan mujallar za ta fara da shi dole ya kasance ya tattara waɗansu abubuwa masu dama da za a fada wa al’umma. Shin wannan ayyukan yayi su ne a bayyane ko kuma ya yi su ne a ɓoye. Sannan kuma daga cikin abubuwan da muka duba har muka ɗauko wannan bawan Allah shine, cikin jerin ƙa’idar da Mujallar Duniyar Computer ta gindaya shi ne, dole duk wanda za mu fara da shi ya kasance dattijo ne mai shekaru da yawa, sannan ya kasance mutum ne wanda ya yi ayyuka aƙalla biyar waɗanda suka sha banban da irin ayyukan da mutane suka saba ji ko suka saba gani. Sannan kuma dole wannan mutum ya kasance ya taimaka wa harkar ilimi wacce ita ce ginshikin rayuwar al’umma, sannan wannan taimakon da ya yi shi ma ya kasance ya saɓa wa mutane da irin yadda suka saba ji wajen taimaka ilimi. Sannan ya kasance ya kawo ci gaba mai girma ga al’ummarsa ya kawo ya kawo shine ga mutanen sa da kuma yankinsa ko kuwa wannan ci gaban da ya kawo ya kawo shi ne domin jama’ar baki ɗaya. Daga ƙarshe kuma duk wanda zamu fara da shi dole ya kasance yana yin wani irin taimako ga al’umma wanda wannan taimakon ya saɓa wa al’umma ta fannoni da dama.

Wannan wani bangare ne daga cikin ajujuwa da ake da su a Legacy Computer Institute da ake koyar da ilimin CISCO
Wannan wani bangare ne daga cikin ajujuwa da ake da su a Legacy Computer Institute da ake koyar da ilimin CISCO

Irin waɗannan ƙa’idoji da muka saka sai muka gano cewar wannan bawan Allah da za mu yi magana a kansa ya tattarasu har da ma ƙari a kan waɗannan. Wannan dalili ya sanya muka haɗu a kan cewar lallai idan muna son mu yi wa kanmu a dalci to lallai mu fara da shi.
Da yawa mutane suna ganinsa ne soja sannan kuma mutumin da ya zama mai bai wa shugaban ƙasa shawara a harkar tsaro har sau uku, sannan kuma mutum ne wanda ko a soja da ya yi sunansa ya yi fice, haka kuma idan aka zo ta harkar jama’a sai ka ji mutane suna mamakin idan sun gansa a gidan biki ko mutuwa ko wani taro sai su yi ta mamakin daman wannan shi ne Janar Ali Gusau? Ba ma wannan kaɗai ke baiwa mutane mamaki ba sai irin yadda muka zaɓe shi a matsayin gwarzon mu wanda ya zama mutum na farko da za mu fara magana a kansa.
To dai na mamaki, lallai mutane iri biyu ne, akwai mutanen da Allah ya yi su, babu abin da ya dame su shi ne idan sun yi ayyuka babu abin da suke so sai a yi ta banbaɗanci da ƙaraji a kansu a gidajen yaɗa labarai. Sannan akwai waɗansu waɗanda duk abin da za su yi suna yinsa ba tare da hannun hagunsu ya san abin da na damansu ya yi ba. Janar Aliyu Muhammad Gusau yana ɗaya daga cikin waɗanda suke yin ayyukan ci gaban Al’umma amma kuma ina tabbatar muku da cewar mutane da yawa ba su sani ba. Mun kasa ayyukan da yayi manya kashi huɗu domin mu sauƙaƙewa mai karatu bibiya.

ILIMI

Mu fara da matakin gina al’umma ingantacciya, dukkanin wani aiki da mutum zai yi to babu kamar gina al’ummar sa, shi kuwa gina al’umma ya dace ya zamanto wani abu ne wanda idan har za ka yi to ka ɗauki matakin farko na ‘koyar da mutane yadda ake kama kifi ba ka zamanto mai ba su kyautar kifin ba’.
Janar Aliyu Muhammad Gusau, ayyukan ci gaba da ya yi wa al’umma a fannin ilimi ya sha banban da irin wanda mutane su ke zato, domin a nashi irin salon babban abin da ya fi mayar da hankalinsa matuƙa shi ne harkar ilimi. Kowa yasan cewar ilimi shi ne abin da yake fitar da al’umma daga cikin duhu zuwa haske, sannan kuma ilimi shi ne ginshikin al’umma duk al’ummar da takasance iliminta ya yi ƙaranci to haƙiƙa wannan al’ummar ko mu daɗe ko a kusa watan wata rana zata zama maƙasƙanciya abin wulaƙantawa.
Da farko dai Janar Aliyu Muhammad Gusau ba wai gini kaɗai na makaranta shi ne a gabansa ba, domin idan ana maganar ilimi to zamu duba mu gani cewar akwai gudunmuwa ta musamman da kuma mayar da hankali na haƙiƙa da ya yi wajen ganin ya fitar da al’ummar sa a cikin duhu zuwa haske.
Ba mu da lokacin da za mu ɗauki aiki ɗaya bayan ɗaya muna yi wa mutane bayani amma kuma yana da kyau mu ɗauki kaɗan domin mu fitar da zahirin abin da muke magana a kai. Koma mahaifar Janar Aliyu Muhammad Gusau, za ka samu wata makaranta a garin Gusau gaba kafin gidan gwamnati a hanyar zuwa garin Sakkwato wacce ake kiran da College of Islamic Studies babu ko shakka wannan makaranta ba mallakin kowa ce ba illa Janar Aliyu Muhammad Gusa. Wannan makaranta ta sha banban da irin makarantu da mutane su ka sani, baya da zubi na gini da ta sha sannan kuma ga shi an saka mata kaya na garari wanda ko makarantun gwamnati to a yanzu ba ka samun irin waɗannan kaya.
Tana da manyan ɗakunan bincike na kimiyya da fasaha wanda ake kira a Turance da Labrotary manya guda uku wanda kayan da ke ciki ba ka buƙatar komai a wurin wasu
Ba wannan kadai Janar ya yi a wannan makaranta ba, ya kasance yana lura da sha’anin albashin malamai na wannan makaranta da dukkanin abin ita makarantar take buƙata. Wannan shi ne farkon sakayyar da Janar ya yi wa al’ummarsa da su ke Jihar Zamfara wanda hatta mutanen wannan garin sun ɗauka cewar wannan makaranta mallakin gwamnatin tarayya ne, to wannan ke nan wanda akwai irin wadannan makarantu da ya yi musu haka wanda ba su kidayuwa.
Idan kuwa muka dawo garin Kaduna ita ma za mu ɗauki makaranta guda wacce ita wannan makaranta ta isa abin alfahari da kuma abin nuna wa jama’a. Idan kana tafiya kan Layin Ali Akilu daga garin Kaduna ka shiga layin Dendo akwai wata makarantar kwamfuta mai suna Legacy Computer Institute wanda ta fara yin aiki tun shekarar 2005 wacce wannan makaranta ta shahara matuƙa a cikin garin Kaduna da kewaye wacce ita ma Janar Aliyu Muhammad shine wanda ya gina ta kuma ya ke tafiyar da harkokinta.
A Legacy Computer Institute abubuwan da janar ya ke yi ya sha banban da sauran taimakawa ilimi da sauran al’umma suke yi. Domin a Legacy Computer ce kaɗai dukkan waɗansu kwasa-kwasai da ake yi shi janar da kansa ya ke bada tallafi domin ganin kowa ya samu wannan ilimi cikin sauƙi. Kasancewar idan dambu ya yi yawa baya jin mai, shi a wurin janar ba haka abin ya ke ba domin babu wani kwas da ake gabatarwa a wannan makaranta wanda bai bayar da tallafi ba.

Dakin bincike (Library) na Janar Aliyu Muhammad Gusau da ke garin Kaduna
Dakin bincike (Library) na Janar Aliyu Muhammad Gusau da ke garin Kaduna

Ba a maganar irin kayan aiki da aka zuba a wannan makaranta, domin baya da samar mata matsuguni ƙasaitacce da kuma tabbatar da ita a wurin da kowa zai iya zuwa, Janar ya sanya kayan karatu na zamani wanda duk wanda yake buƙatar karatu to zai same su. Daga cikin irin wannan gudunmuwa da yake bayarwa, ni ina ɗaya daga cikin wadanda suka amfana da arzikin wannan bawan Allah ta hanyar kwas da muka yi a wannan makaranta. Shi wannan kwas da ake kira da IT MASTER wanda mutane suke yin min laƙabi da Salisu Webmaster ya samo asali ne daga wannan makaranta. Wannan wani kwas ne da duk Najeriya babu inda ake yinsa sai a Legacy kwas ne wanda duk wanda ya yi sa daga farko zuwa ƙarshe zaka zama ƙwararre a fannonin kimiyya da fasahar kwamfuta, ba a nan abin ya ƙare ba, wannan kwas makarantu manya na Duniya suke bayar da takardar shaida, daga cikin makarantun akwai New Jersey Institute of Technology da ke kasar Amurka wanda idan mutum ya gama wannan kwas yana son zai ci gaba to akwai makaranta a ƙasar Kenya wacce mutum zai je ya yi digiri a kansa. To wannan kwas a lokacin da muka yi shi ana biyan dubu hamsin wanda ake yin watanni tara amma kuma wani abu da mutane ba su sani ba wannan kwas asalin kuɗinsa naira dubu ɗari ne, kai ka biya rabi janar ya biya maka rabi. Wannan abu haka yake domin gani ba daidai yake da labari ba.
Idan muka duba sake inganta wannan makaranta da janar ya yi na sauya mata babban wuri za mu ga cewar an sami nasarar ƙara haɓɓakata da abubuwa da yawa, misali a yanzu haka akwai kwas na Cisco wanda a sauran makarantu ana biyan kuɗi da bai gaza dubu saba’in ba amma a Legacy Computer Institute ana biyan dubu talatin. A cikin irin nashi taimakawa da yake yi shi ke cika wa al’umma wannan kuɗaɗe. Idan muka ce za mu tsaya mu ɗauki aiki ɗaya bayan ɗaya da ake yi a wannan makaranta ta Legacy Computer to sai mucike takardu da rubutu ba tare da mun tsallaka wani sashe ba.
Har ila yau ta ɓangaren ilimi domin kowa ya san cewar idan aka bai wa al’umma ilimi an gama gina ta, janar ya samar da wani irin ɗakin bincike da karatun wanda a halin yanzu zai yi wahala ka sami wani ɗakin bincike da karatu a cikin garin Kaduna da ya fi shi yawan littafai, wanda ake kira da Aliyu Muhammad Library.
Wannan ɗakin bincike kusan yana da komai da dalibi yake buƙata domin ya yi bincike, da farko dai dukkan wani littafi da kake jin ya shahara a duniya akwai shi a ciki, aƙalla a yanzu akwai sama da littafai zalla ba mujalladai ba, sama da dubu ɗari da ashirin wadanda a yanzu kawai an shirya sama da dubu tamanin a kantocinsu.
Ga kuma wata irin kwamfuta ta musamman ga waɗanda ba sa son karatu a littafi su yi amfani da ita. Ita wannan kwamfuta mai manhaja ta e-granery yana ɗauke da duk wani rubutu na littafai da jaridu da mujalla a cikinsa.
Shi wannan ɗakin bincike na kyauta ne ga dukkanin ɗalibai masu karatun gaba da sakandare da masu yin bincike na addini da sauran karatuka. Duk a daidai lokacin da na ke rubuta wannan tsokaci ba a buɗe wannan ɗakin karatu ba, amma dai mutane da dama a hakan suna ta zuwa domin yin bincike. Wannan ɗakin bincike ya samu kula ta musamman domin a halin da muke ciki kusan dukkanin littafan da suke cikin wannan ɗakin an shigar da su a cikin kwamfuta wanda da zarar mutun yana son littafi ba sai ya sha wahalar nema ba, sai dai ya shiga kwamfuta ya tambaya ita kuma ta faɗa masa a wane kanta za ka samu.
A cikin ƙoƙarin ganin an daidaita matsalar ilimi da harkokinsa na Legacy Computer da College for Islamic Studies da kuma Aliyu Muhammad Library mutane basu yi aune ba kawai sai muka samu labarin cewar akwai wata jami’a ta gani ta fada da janar ke gina wa al’umma a garin Abuja. Idan har Allah ya sa an kammala wannan jami’ar to za ta share wa mutane da yawa hawaye, sannan kuma kamar yadda ya saba ita wannan jami’ar za a bata kulawa ta musamman yadda za a bai wa ‘ya’yan marasa ƙarfi damar yin karatu.
Jami’ar da za ta riƙa ɗaukar dalibai daga ko’ina na sassan ƙasarnan, sannan a wannan jami’ar za a mayar da hankali wajen karatu da manhajoji na zamani waɗanda za su taimaka wa ɗalibai domin samun ingantaccen ilimi da za su zama jagorori nagari ga al’umma baki ɗayanta.
Ta bangaren ilimi ke nan.

TALLAFI DA GURABEN KARATU

Library - Aliyu Mohammad GusauDuk da irin waɗancan tallafi da muka bayyana Janar bai tsaya a cika kuɗin karatu da yake yi ba a makarantunsa ba, akwai kuma ƙarin kuɗaɗe da yake ware wa domin taimaka wa mutanen da ba su da ƙarfi amma kuma suna karatu a waɗansu wurare ko kuma gurbin ilimi da yake cika musu domin su ƙaro karatu ko kuma su je su yi shi.
Ba za mu iya sanin adadin mutanen da shi janar ya ba su guraben karatu ba tun daga matakin Firamare har zuwa jami’arsu ba, adadinsu baya ƙididdiguwa. Ba a wannan kaɗai abin ya ƙare ba, domin akwai tallafi da yake baiwa dalibai domin su tafi ƙasashen waje domin su ƙaro karatu ko kuma ilimi da ake da shi a waccan ƙasar wanda a wannan ƙasar ta mu ba mu da shi.
Ba a maganar waɗanda suke zuwa suna karɓar kuɗin makarantar yaransu na sakandare ko jami’a. Idan muka dawo ga fannin bayar da tallafi har ila yau a daidai wannan lokacin da muke rubuta wannan muƙala akwai sama da mutane hamsin waɗanda Janar ya basu tallafin yin karatu a ƙasashen waje, tun daga farawa zuwa karewa.
Ta fannin gidan soja kuwa a cikin gurabun da janar ake ba shi a lokacin da za a ɗauki sababbin sojoji, Janar Aliyu Muhammad Gusau ya na bai wa duk wanda yake so ba tare da ya san waye shi ba. Duk da yake mutane masu yawa sun kawo ƙoƙon bararsu, tun daga gidan ‘yan sanda, da kwastam, da imagination da makamantansu. Waɗanda suka samu wannan gurabu za su iya faɗa maka cewar ba su taɓa ganin wannan bawan Allah ba, waɗansu ma gani suke yi an ce su kawo takardar neman shiga soja, kuma su ga an samu, da shi da ya samu, da gurbin wanda ya shiga duk ba wanda ya taɓa ganin ɗaya daga ciki.

SAMAR DA AIKIN YI

Duk mutumin da aka lissafa irin waɗancan ayyuka kuma ya tabbata cewar waɗannan ayyuka an yi su, to ba shakka samar wa mutane aikin yi a wurin wannan bawan Allah ba abin wahala ba ne. Ayyukan yi da janar ya samar ga al’umma yana da yawa. Ko da za mu tsaya kawai ga ma’aikatunsa, kama daga Gusau, mutane da dama suka samu aikin yi, haka mu dawo garin Kaduna, mu ɗauki inda muka yi magana Legacy Computer Institute shi ma mutane da dama suka sami aikin yi. Haka mu ɗauki wannan jami’a ta Gusau Institute da ake ginawa a garin Abuja mutane nawa za su sami aikin yi.
Daga cikin irin gina al’umma da Janar Aliyu Muhammad yake ƙoƙarin samar wa al’umma shi ne samar da kafafen yaɗa labarai na zamani wanda kuma suke yin kafaɗa da kafaɗa da sauran gidajen yaɗa labarai na duniya. Mu ɗauki gidan radiyon Nagarta, wannan gidan radiyo na ɗaya daga cikin gidajen da suke ƙoƙarin wayar da kan al’umma wajen abin da ya shafi tarbiyya da kuma ilmantarwa da nishadantarwa.
Kamar yadda mutane da dama suke sha’awar shirye-shiryen da wannan gidan radiyo yake gabatarwa, a ƙarin ƙoƙarinsa, a yanzu haka an kusan kammala shirye-shiryen buɗe gidan talabijin wanda zai fuskanci ƙalubalen da Arewacin Najeriya ta ke fama da shi.

WAƊANSU AIKACE AIKACENSA

Kamar yadda muka faɗa tun daga fari cewar ba ma son mu tsawaita a kan ayyukan da wannan bawan Allah yake aiwatarwa, ba za mu iya ba saboda yawansu.
Waɗansu daga cikin ayyukan da ya shahara wajen yinsu kodayake mutane da yawa ba sani ba, shi ne aikin taimaka wa Addinin Musulunci, Janar yana ɗaya daga cikin mutanen da suke yin aiki da ya shafi Addini wanda ba su misaltuwa. Kama daga ginin makarantun Islamiya a garuruwa da dama, da gyaran masallatai da ake salloli biyar da kuma gina masallatan Juma’a da buga littattafai ana raba wa mutane.
Da na yi maganar masallatan Juma’a sai na ga ya dace mutane su sani cewar akwai wurare da dama a cikin ƙauyuka da birane da Janar ya gina wa masallatan Juma’a wanda mutane da yawa sai dai suga an kawo musu gudunmuwa ko kuma a zo a tambayi mutane a ina kuke son a gina shi.
Ba a maganar taimaka wa gajiyayyu wajen matsalolinsu, kama daga marasa lafiya da wanda suka gaza wajen biyan kuɗin magani a asibitoci, da mafi yawan wadanda ake yi wa aiki ko kuma suke neman taimakon fitar da su ko kuma suke neman taimako domin yi musu aikin da sai an haɗa da ƙasar waje. To, a zahirin magana mutane da dama sun sami wannan tallafi ko dai ta hannun masu tafiyar da harkokin taimakawarsa, ko kuma ta hannunsa.
Janar mutum ne wanda kusan duk ayyukan da ya yi a rayuwarsa, a boye ake yin su, duk taimakon da zai bayar baya tara ‘yan jarida da watsa labarai, shi yasa da zarar wani ya bada waɗansu maƙuden kuɗaɗe ga wata makaranta sai ka ji mutane suna cewar to ina na mu Janarorin suke. Irin tallafi da Janar ya ke baiwa da za a tattarashi a shekara sai kun riƙe baki. Akwai waɗansu aikace-aikace da ya ke yi wanda mu kanmu da muka samu labari sai da muka girgiza. An faɗa mana cewar kada mu kuskura mu faɗi adadin kuɗaɗen da muka gani domin ba zai so ba, amma jimillar taimako da yake kaiwa na abinci da Ramdan kawai na garuruwa huɗu kacal kuɗin ya fi ƙarfin tunanin mai tunani. Haka manyan ɗakunan taro da ya ke kinawa wa cikin waɗansu jami’o’i da ke Arewacin Najeriya shima abin ya yi yawa. Haka lokacin aikin Hajji tallafin abin da ake ci a garin Makka shima da muka ga kuɗin kan mu ya ɗaure.
Daga nan ne muka ƙara fahimtar cewar lallai wannan bawan Allah Janar Aliyu Muhammad Gusau ya yi nisa a harkar taimaka wa al’umma sannan kumu baya son kwakwazo. Muma kanmu da muka yi wannan rubutu ba mun yi domin mu tona masa asiri ba ne, sai dai domin yawan ƙorafi da mutane suke yi na cewar ba su san irin waɗanna ayyuka ba.
Da wannan ne nake ganin ya kamata in rufe wannan rubutu nawa da faɗa mana yadda Janar yake, mutum ne wanda baya ɗaukar raini kuma mutum ne wanda baya son shisshiga da katsalandan a cikin rayuwarsa. Mutum ne wanda yake tafiya a kan kaifi guda, idan e to e ne kawai, idan kuma aka ce a’a to a’a din ce. Ya na kuskure kamar kowa kuma ya da sauƙin kai da hatta ma’aikatansu suna masa gyara kuma ya karɓba, ya na da tsare alƙawari idan ya ce same ni a wuri ƙarfe ka za zaka same shi.
An haife shi a garin Gusau da ke Jihar Zamfara a yanzu a 18 ga Mayun shekarar 1943, ya yi ritaya a gidan soja a watan Satumbar 2010 ya na da matsayin Lutanal Janar. Ya riƙe matsayin shugaban sojoji na wani ɗan lokaci, haka ya zama mai baiwa shugaban ƙasa shawara a harkar lokacin mulkin Obasanjo da Shugaba Goodluck. Allah ya azurta shi da iyalai, maza da mata da kuma jikoki.
Allah ya ƙara masa lafiya da tsawon kwana, ya sanya irin wannan ayyuka na alkairi da yake yi a ɓoye da bayyane ya saka masa da alkairi, ya kuma tsare shi daga duk wani irin sharri da ya sani da wanda bai sani ba.
Haƙiƙa ba mu bada wata shaida a kan shi ba, sai da abin da muka sani, sannan kuma a kan abin da ya ke ɓoye mu bamu zamanto masu sanin gaibi ba.
Wannan shi ne kaɗan daga cikin ɗin bin ayyuka da Janar Aliyu Muhammad Gusau ya ke gabatarwa.

Categories
Hannunka mai sanda

Muhimmancin Ilimin Computer – Kowa ya iya allonshi ya wanke

Ko ba a gwada ba an san linzami yafi karfin bakin kaza, domin mahimmancin computer da iliminta ya wuce a ce mutum bai sani ba. Domin ko ba a fada maka ba lura da yadda ta mamaye kusan mafi yawanci abubuwan mu na yau da kullun. tun daga makarantunmu, ma’aikatunmu kasuwancinmu, asbitocinmu, gidajen yada labarai da makamantansu, dukkanin su za ka samu a na amfani da ita  Computer.

Kusan a wannan zamani, computer ta samar da sauki wajen tafiyar da alamura ga dan adam. Kama daga rubutun takardar wasika zuwa takardar sanarwa ta wajen aiki ko takardar notice, takardar biyan albashi da lissafin kudaden kasa da yin kasafin kudi, hada da harkar hada- hada, da bayanai na kididdiga da fitar da kudade a bankuna, duk computer ta kawo sauki ta kowanne fanni.

Haka kuma computer ta samar da sauki wajen tafiyar da harkar banki, ka duba ATM yanda yake, computer  take karbar cheque ko kuma ta baka kudi, ko kuma ta cireshi. Ga wadanda suke sayan kaya a kasashen waje suna amfani da computer wajen duba yanayin kayan su da kuma sannin a wane wuri kayan suke da kuma lokacin da kayan zasu iso. Ta bangaren kasuwanci, idan ka zuba wa computer bayanan harkar kasuwancin ka, kayan daka siyo, ka ware mata kudaden wahalhalunka, kama daga kudin abinci, kudin sallamar ma’aikata, kudin dauko kaya, kudin shago da kudin wuta za ta fitar maka da ribarka ko kuma faduwarka a dan kankanin lokaci.

Haka za ta iya a jiye maka wasu mahimman bayannanka bayan tsawo shekaru idan ka nemi ta fitar maka za ta fito maka da su.

Haka da zamu koma wajen fanin kula da lafiya ana amfani da computer wajen binciko yanayin cuta da mazauninta a jikin dan adam, ba tare da likita ya tambaye shi ba, hakanan  ana iya bincikar cikin da mace take dauke da shi a gane lafiyar shi ko rashin lafiyar shi da yanayin kwanciyar shi, duk a cikin dan kankanin lokaci.

Dawo bangaren makarantu zaka samu suna amfani da computer wajen saukaka bincike da nazarin darussa ga yara. Sukan yi amfani da ita computer ta wajen kimiyya da fasaha don gano adadi da kididdiga. Ana samun na’ura da take dauke da muhimman takardu ga daliban fiye da dubu dari uku wanda zai yi wahala a sami wani laburari a karamar makaranta dake de littafi daban daban har dubu goma.

Ta hanyoyin sadarwa computer tana taimakawa gidajen jarida, da na watsa labarai wajen gyare gyaren tarin rubutu ,video da sauti wanda a dan kankanin lokaci sai su gyara ayyukansu don watsawa don haka da taimakon computer ba sa bukatar sai sun shiga studio kafin su dauki bayanan da za su watsa.

Haka nan sadarwa da aka samu ta yin amfani da wayoyin ta fi da gidanka(salula) za ka iya rabuta wasika ka aika, zaka iya aje alama ta tunatarwa, zaka iya daukar hoto ko video zaka iya yin lissafi da dai makamatansu ciki dan kankanin lokaci ba tare da wahala ba.

Kasancewar ci gaban internet ya mamaye dukkan fannonin rayuwar dan adam a yau ba ta tafiya yadda ya kamata sai da internet ilimin computer shine sinadarin cin moriyar internet

Idan kuwa muka duba bangaren tsaro, a zamanin da, zaka samu yana da wahala a gano file(kundin) na laifi da mutum yayi bayan an kai shi kotu, amma yanzu da zarar an saka bayanan shi, nan take za a samu, ka duba irin Computer da take bincikan ‘yan yatsu da fuskar wanda ake zargin shi da laifi, ko da yake yanzu ne aka fara irin wannan tsari a wannan kasa ta mu Najeriya.

Haka idan ka duba hatta cikin motoci da abubuwan hawa kamar jirgin sama, da jirgin kasa da jirgin ruwa za ka samu akwai computer a jikinsu, daga abinda yake sarrafa yanayin zafi ko sanyin abin hawa computer dake ciki take tafiyar da shi. Ballantana uwa uba ire-iren abubuwan hawa da ake kerowa na zamani a yanzu akwai motar da ake samun computer a cikin ta wacce duk inda wannan motar take a duniya za a iya kashe ta ko kuma a kunna ta, haka nan jirgin sama muna da labarin jirage irin na yaki wanda kasahen da suka ci gaba suke da su wadanda babu matuki a cikinsu, computer da ke ciki ita take sarrafa su, wanda ko da abokanen gaba sun harbo wannan jirgin to ba za a rasa rai ba.

Computer ta kawo sauki ga masu ayyuka irin wanda a da sai an dauki tsawon lokaci ko kwanaki kafin ace an kammala su. Misali abin da ya shafi lissafin dukiya don fitar da gado an sami sauki mai yawa ,idan ka duba Computer da take rabon gado wanda duk abinda mutum ya mallaka komai yawansu, komai yawan wanda za su gaje shi, da zarar an gama zuba mata bayanan dukiyar da magadan sakon biyar yayi yawa ta gama raba wannan gado kamar yadda Allah madaukakin sarki ya fadi ayi ba tare da ta rage wani abu ko ta karashi ga wani ba.

Mu koma bangaren kere-kere shima Computer tana taka mahimmiyar rawa wajen kere- keren abubuwa wanda a zamanin da, sai an sami karti majiya karfi suke iya kera wannan abun. Idan muka koma harkar zane zane, yanzu an kai fagen da idan ka nuna fili kace ga girmanshi, kana son bishiya kaza, filawa kaza,  kana kuma son mota irin kaza, ga irin fenti da kake so, ga irin kofofi da dai dukkan abinda za ka fadi da ya kamata a ganshi, kana gama lissafi wanda zai zana maka gidan yana kwafewa a ‘yar karamar takarda a hannunshi, da zarar ya gama zana gidan sai yayi amfani da daya daga cikin program na Computer ta gina wannan gida a cikin ta kamar yadda kace kana son, ka ganshi kamar da gaske babu wani abu da za ka ce ba na  gaske bane, wanda idan kace kana son a bude maka cikin gidan kaga yadda kujeru da bayi da kayan kichin suke duka za ka gani. Kuma idan aka gama gina maka gidan na zahiri za ka ga babu bambanci tsakanin na cikin Computer da naka na waje. Abun kamar almara.

Dawo bangaren “na duke tsohon ciniki kowa ya zo duniya kai ya taras” wato noma da kiwo, wadannan sana’o’i a wannan zamani za ka ga yadda na’urar Computer ta ke taimakawa wajen ganin inganci gona da abinda manomi zai shuka, da yadda ake yin taki, da yadda ake fitar da magungunan kwari, da dai makamantansu. A yau akwai Computoci wadanda suke sarrafa kayan gona, kamar irin computer da take tsotse ruwan jikin tumatiri ta kyafeshi a cikin dan kankanin lokaci, babu ruwanka da shanya da makamantansu.

Idan kuwa muka zo bangaren kasuwanci, ai abin ba a cewa komai, ka duba hada-hada irin ta banki yadda abubuwa suka saukaka, a da, babu yadda za ka je wani banki ka ajiye kudi sannan kaje irin wannan banki ka cire kudinka, ballantana ace kaje wani gari ko kuma kaje wata kasa, ai babu hali. Amma a wannan zamani da ilimin computer ya yawaita, bama ka saka kudi a cikin account dinka ba, hatta saye da sayarwa za ka yi a duk inda kake so a duniya, kuma a kawo maka inda kake so, ba tare da kaje wurin ba, ko kayi magana dasu baki da baki ba, ta Computer za a gama komai, su nuna maka irin kayan da suke da su, da farashinsu, su kuma gaya maka idan har ka siya wadannan kaya kwana kaza za suyi daga kasa kaza zuwa kasa kaza. Koma ga kananan ‘yan kasuwanmu masu sayar da kayan taro da sisi sannan kuma masu son su kididdige cinikinsa, to, kaga abinda yafi dacewa da su itace Computer. Domin itace wacce komai yawan cinikin da akayi a rana ko shekara idan aka ce ta kawo lissafinsa za ta kawo ba tare da wani bata lokaci ba. Ba lissafi kadai za ta iya yi maka ba, hatta  irin ribar da kake son ka samu zata fitar maka, zaka gaya mata kudin kaya, ka gaya mata kudin dako, ka gaya mata kudin abincinka da yaran shagonka, ka gaya mata adadin yawan kayan da ka siyo, ita kuma ta baka mamaki wajen fitar maka da taswirar yadda za ka sami cikakkiyar riba. Kai hatta abubuwan da ka siyar a baya ita Computer zata iya fitar maka da bayanai na ban mamaki, kamar ta gaya maka a shekaru talatin da ka  ke kasuwanci shekara kaza kafi cin riba, sannan wata kaza kafi cin riba, sannan ta fitar maka da shekarar da kafi faduwa da rashin ciniki, sannan ta gaya maka kwastomanka da yafi kowa siyan kaya awurin ka da wanda ya siya kaya sau daya da sanda suka yi kasuwanci na karshe da abinda suka siya da kuma kudin da suka biya.

Sabo da haka, idan ka lura za ka ga cewar Computer wata makami ce da mutane suke amfani da ita wajen tafiyar da alamuransu na yau da kullum, sannan a wannan zamani da muke ciki a yanzu zai wahala dan adam yace zai gujewa amfani da Computer, domin na farko kusan mafi yawan mutane suna amfani da wayar tafi da gidanka (GSM), ga amfani da ATM wajen fito da kudi, da dai makamantansu, ballantana wanda yake da akwatin email, ko kuma yana amfani da dandali irin su Facebook ko twitter, ballantana wanda yake aikin jarida ko ma’aikacin asibiti da dai dukkan wanda rayuwarshi ta shafi harka da Computer.

“Bama a nan gizo ke saka ba” ka duba yadda duk mutumin da yayi karatun zamani komai zurfin karatun da yayi sai ka ga ya hada da na Computer, kuma zai yi wahala ace mutum yana da ilimin Computer ko yaya yake yaje neman aiki ace ba a sa sunan shi a cikin wadanda za a tantance ba, musamman ace ya karanta wani fanni mai mahimmanci, ko kuma wata babbatar ma’aikatar da ta kera wani program ko hardware sun bashi shaidar cewar shi kwararre ne (Certification). Kamar mutumin da ya karanta fannin kasuwanci ya sami daraja ta biyu (Second Class) amma gashi ya iya amfani da Computer  har yana da shaidar kwarewa akan Excel ko Peachtree wanda su wadannan software suna taimakawa wajen warware matsalar kasuwanci. To zai yi wahala yaje neman aiki ya zamanto ga wanda yake da daraja ta farko (First Class) amma bashi da wancan ilimin ace ba a dauke shi ba. Irin wadannan misalai suna da yawa, kamar mutumin da ya karanta fannin zane-zanen gidaje sannan ya zamanto bai iya amfani da computer ta fannin zane ba, kaga zai yi wahala a ce ga wanda ya karanta irin kwas na shi kuma ya san daya daga cikin program da ake zane dasu ace wancan aka dauka ba shi ba.

To ashe idan har gaskiya ne Computer ta kewaye kusan ko ina a harkar mu ta yau da kullum, babu abinda ya fi dacewa illa mutum ya fahimci yadda zai sarrafa wacce yake tare da ita, ko da kuwa yaya kankantarta yake. Na san mutane da yawa ba da son ransu suke son a ce su kai aikin sirrinsu wajen Business Center ba, wajen da babu sirri, ba ka san waye zai karanta sirrinka ba, ga shi kuma kana da Computer a gida ko kuma a ofis amma abin bakin ciki ba ka iya sarrafa ta ba. Ka duba wani abin haushi “nama na jan kare” zaka samu hatta waya a wannan lokaci zaka ga mutane da yawa basu iya sarrafa ta ba, sai dai idan an turo musu da sako su kira wani ya duba musu. Bama wannan shine ya fi ban takaici ba, hatta ATM wanda ba a son wani ya san lambobinka guda hudu da kake amfani da su na sirri ka ciro kudi, sai kaga mutum duk sanda zai ciro kudi sai ya nemo wani sannan ya ciro mishi. Ashe idan haka ne ilimin sanin yadda zaka sarrafa  Computer wajibi ne.

Categories
Hannunka mai sanda

HANKALI KE GANI BA IDO BA, wani ya je Kano ya ce bai ga mota ba

Taken wannan mukalar ya kamata ace Tsumagiyar kan hanya, amma sai aka kira ta da Hankali ke gani ba ido ba, wani ya je kano ya dawo bai ga mota ba, ko kadan shi kan shi wannan maganar hankali ba zai dauka ba, domin babu yadda za ayi ace mutum ya shiga birnin Kano idanun shi lafiya, shi ma lafiya amma ace bai ga mota ba. Sau tari rashin ko in kula ke kai mu zuwa ga wani tafarki makaskanci, domin idan ba rashin lura ba, alummar hausawa ‘yan Arewacin Najeriya, mu ne wadanda lokacin zuwan turawan mulkin mallaka su ka same mu da suturarmu, makarantunmu, sarautarmu, sana’o’inmu, shugabancinmu, kokarinmu, sadaukantarmu, kusan babu wani abu da su ka tarar da ba shi da tsari wanda alummar hausawa suke yi.. Amma a wannan lokaci sai ga shi an bar mu a baya ta fannoni daban-daban, musamman ta fannin abin da duniya ke ciki, zaka samu duk abinda ya shigo na zamani mutanenmu sune kan gaba, amma ba wai suna kan gaba wajen gano yadda ake yin wannan abu ba ne, a a, sai dai yadda za su kara lalacewa, duk abin da bai kamata ayi ba ta bangaren almubazzaranci da girman kai za ka samu malam bahaushe shi ke kan gaba, kama daga abinda ya same mu na rashin hadin kai da shugabanci, wanda ko da mun yarda da rashin shugabanci ai bai kamata mu yarda da kaskanci ba. Za ayi hakuri tabbas da abinda sauran bayanai ‘a wannan makalar , domin a zahiri ba mu na magana da kowa ba ne, face muna magana akan abinda wannan al’umma ta mayar da kanta. Kuma mun yi wannan maganganu ba domin tozarci ba illa domin mu tashi yaranmu da manyanmu mazanmu da matayenmu mu gyara, domin idan muka gyara, dadin ba na kowa bane illa namu.

Kusan idan ka duba mutane goma da suke amfani da Computer, za ka samu bakwai daga ciki basu san amfaninta ba, ban da jin wakoki babu wani amfani da su ke ganin ta na da shi. Biyu daga cikin ragowar ukun zaka samu sun san mahimmancinta, amma ba su san yadda za su yi amfani da ita ba. Shi kuwa ragowar gudan shi ne kawai ya san ta, ya san mahimmancinta, sannan ya kuma iya amfani da ita. To kai mai karatu ka na wane bangare ne?

Duba wayar tafi- da- gidanka, za ka sa mu ga shi mutum ya mallaki wayar amma abin takaici da ban haushi bai san yadda zai sarrafata ba domin ta yi mi shi aiki kamar yadda aka tsara. Waya da muke gani ita ma computer ce, kuma kusan abubuwa da ake iya yi da Computer da yawa ana iya yi da ita waya, sannan kuma ita waya  kira kadai ake yi da ita ba, ko kuma ajiyan karatu ko video ko kuma ajiyar hotuna a ciki ba, a a wasu wayoyin sun wuce da hakan. Saboda haka, za ka sa mu mutum ba shi da wata harka da yake yi da waya wacce ta wuce ya kira ko a kira shi sai ka tarar mutum ya  sayi wayar dubunnnai wacce dalilin da yasa aka yi ta ba kawai ayi amfani da ita wajen kira bane amma shi sai ya buge da yin kira kawai. A misali duk wata waya da ta zamanto ana iya samun abinda ake cewa WAF a jikinta, to ita wannan wayar za ta iya zama maka wani abu da zaka iya amfani da shi wajen shiga Internet ko kuma duba Email, ko kuma amfani da ita wayar wajen gane hanyar wani gari idan ta bace maka, da dai makamantansu.

Idan mu ka koma ta bangaren makarantunmu, idan ka sami daliban da suke karatun Computer ko kuma suna karatun Electrical Engineering ko kuma suna karatun Architecture sannan ace malam bahaushe ne, kuma ayi sa’a ya mallaki wannan compter, ka ga ai ya sami kayan aiki wanda idan yayi amfani da ita ta hanyar da ta dace za ta saukaka mishi. Amma abin takaici da bacin rai, sai ka samu banda kide-kide da wake-wake da kallace-kallacan bidiyo da kuma buga game babu abin da ya saka a gaba. Ina son ku dubi abokanan zamanmu wadanda suke zuwa karatu irin wanda kuke yi, za ka ga sun fi mayar da hankali ta kowanne fanni, sannan su na yin wasa su ma, amma da lokacin karatu ya zo za ka ga lallai sun nuna cewar ba wasa ya kawo su ba. Matsala ta farko da mu ka samu ita ce talasuranci da girman kai, idan ba ka san abu ba, wai kai kafi karfin ace wani da bai kai ka ba, ya koya maka karatu. To, sai meye idan ka fahimta ya isa ya kwace daga wurinka ne? Ko kuma idan ka iya me ka ragu da shi.

Haka kuma da yawa daga cikin mutanenmu wadanda su ke son su ga sun fahimci karatu zaka samu iri na ne wanda bai samu fandisho mai kyau ba, yayi makarantar firamare ta gwamnati, makarantar sakandire ta gwamnati kuma a lokacin ba a san ciwon kai ba, sai da aka shiga jami’a sannan hankali ya zo ake son a fahimci karatu. To, a inda matsalar take a lokacin da ake karatun yana kokarin ya fahimci turancin da ake yi mi shi, bai gama fahimtar turancin ba ballantana ya fahimci abinda malami ya shigo koya musu, ga lokacin tashi yayi, haka zai ta tafiya a cikin irin wannan yanayi har ya gama makaranta. Daman a wannan lokaci makarantu kadanne basu koma “Business Center” ba wato wajen hada-hadar kasuwanci, in da wanda ya iya ba komai ba ne, wanda bai iya ba, idan yana da kudi, to shi zai fito da sakamako mai kyau. A cikin kashi saba’in cikin dari na dalibanmu wadanda suke yin karatun fannin Computer sai ka sa mu ga shi sun yi karatun, sun fahimci turancin amma matsalar ba su sami kyakkyawan gwaji ba (Practical). Domin sau dayawa in ban da yanzu da ake samun wasu gogaggun malamai wadanda suke kara bincike ta fannoni da dama, sai ka samu malami yana karantar da fannin computer amma bai taba hada wani program ko da guda daya ba, ballantana daliban da yake koyarwa su ma su kirkiri nasu.

Idan muka dawo ta irin rashin sanin mahimmancin al’amura ko kuma an san su, amma rashin kulawa ne? Sai ka ga gwamnati ta ware miliyoyin kudade ta sayo computoci masu yawa, amma sun zama basu da amfani ko kadan. Domin a lokacin da hukumar makaranta ke sanar da ta kawo sababbin Computoci a lokacin wasu daga cikin masu kula da kayan suke murnar kakarsu ta yanke saka, domin sun san tun daga lokacin da hukumar makarantar  za ta zube wadannan kaya ba  ta  kara komawa ta kansu. Malamai da dalibai da suke karatu a kan wadannan computer  za ka samu su ma basu damu da wadannan kayan karatunba. Hukumar makaranta ta kan yi asara mai yawa a lokacin da aka ce akwai wani abu da ya lalalce a makaranta, ba wai ina son in bata garin ba ne, amma kusan kwangilar da ake baiwa masu gyaran kayan makarantu wani lokaci sukan ninka kudin sau biyar ko sau hudu akan asalin farashin da ake siyarwa a kasuwa. Duk wadannan ba ci gaba bane ga alummarmu da kuma kasarmu.

Wani abun haushi sai ka samu wasu malamai da ba su fahimci fannin da suke karantarwa ba, idan a ka yi rashin sa’a suka sami dalibai masu hazaka, wadanda ko da wani lokacin ba su Internet ba su dakin karatu, sai ka samu wadannan malamai suna tsangwamarsu, idan wadannan dalibai basu ba su hadin kai ba wajen nuna su ba komai bane, to, wannan malamin zai sha alwashin  sai ya sa wadannan daliban sun maimaita shekara guda. Wadansu kuma dalibai matsalarsu malamai ne, domin idan aka samu wani malami wanda ya san abinda yake yi, sannan kuma ya samu wayewa ta fannin karatunshi, ya dau alwashin sai dalibai sun fahimci karatun ta hanyar da ta dace domin a sami ingantacciyar al’umma, a daidai wannan lokacin dalibai za su shiga zagin shi, suna kiranshi da sunaye na banza, sannan idan wadannan yaran iyayensu masu fada aji ne, sai su kai karar shi malamin wurin hukumar makaranta, ita kuma hukumar makaranta ba za ta yi bincike ba sai ta fara tsangwamar malamin. Wanda nasan wani malami da ya cire makudan kudade ya dauko hayar Projector domin ya nunawa dalibai yadda za su koyi yin project, daliban daman babu wanda suka fi jin haushi  kamar wannan malamin domin suna ganin ya takura musu, amma da hankali a yanzu ya zo musu, da tsarin da yayi musu amfani da shi su ma suke kokarin tafiyar da rayuwarsu.

Ta fannin manhajin da ake karantarwa a makarantunmu na jami’o’i sai ka samu wannan manhajin karatun ya girmi shi kanshi malamin da yake karantar da shi, hukumar makaranta ba ta da hakkin yiwa shi manhajin garanbawul domin yin hakan, tsarin gwamnatin tarayya ne, sannan kuma za ka samu ta fannin Computer mafi yawan Programing language da ake amfani da su sai ka tarar wanda su Bill Gates suka yi amfani da shi ne, wanda ya kai shekaru ashirin da biyar zuwa talatin da fara amfani da shi. Dalilin haka zaka tarar da dalibai babu tserereniya tsakaninsu, domin daman abinda ake karantar da su bashi da wata nasaba. Akwai project da ake baiwa dalibai wanda ya shafi programming wanda asalin wanda ya fara yin wannan program din, a wancan lokacin ya sha wahala kafin ya kammalashi, to tun daga wancan lokacin sai dai ayi ta jujjuyashi, daga wannan, zuwa wancan haka za a tayi ta juyawa har zuwa lokacin da lokacin da Allah ya so.

Idan ka dawo ta fannin wasu daga cikin malami za ka samu dalibai ne suke yi musu karatunsu, domin da zarar malami ya koma karo karatun, kuma aka yi rashin sa a malamin bai damu da karatun ba, to, dalibanshi sun shiga uku da assignment kenan, idan dalibi ya duba manhaja karatunsa  zai ga babu shi a ciki, kuma irin wannan assignment ba za ka ga ya fito a cikin test ba ballantana a jarabawa. Sai wani abin bantakaici da malamai suke yi na matsama dalibai da assignment domin su hada “Course Material” su dawo suna siyarwa dalibai a farashi mai  dan karan tsada.

Idan kuma ka tara wadanda ake ce musu wizard ko guru koma hacker cikin kashi casa’in cikin dari ba su san komai ba, amma a gafarceni, idan ka kwatantasu da wadanda suke kiransu da wandanan sunaye zaka samu lallai haka ne.

Amma idan aka dowo ga zahiri, za ka samu lallai basu san komai ba, duk wanda za ka ji ana kiranshi da wannan suna, ba ya wuce ya san yadda zai sarrafa wani program ne a computer, haka idan aka samu mutumin da ya dan iya amfani da Microsoft Word, kamar zai iya rubuta wasika yayi printing, sai kaji ana ce masa guru. Kuma idan aka samu ya iya cire program ko ya iya sanya wani program ko kuma ya iya installation sai kaji ana kiran shi da suna injiniya Wanda idan muka dubi abin da ido na gaskiya za mu gane cewar duk burga ce domin kusan wadannan abubuwan da za ka ba kan ka awa uku ka kuma natsu ka sa kaifin basira kafin awa ta biyar ta shiga za’ a fara kiranka da wannan sunaye kaima.

Kuma da zaka leka “Business Center” na mu sai ka sha mamaki, domin idan ka duba zaka samu wadanda suke fi kwarewa wajen sarrafa wani program ko application za ka samu ba su taba karatun computer ba, ko kuma sun yi karatun, amma baya wuce yar diploma irin wacce muka yi ba. Gaskiya dole ka jinjina musu a lokacin da suke

amfani da ita computer, yadda suke sarrafa ita kanta computer  za su ba ka sha’awa. Abubuwan kusan hudu za su bata maka rai idan ka tambaye su,(1) wani version suke amfani da shi, zai ce maka bai sani ba, domin akwai wani da aka tambaye shi wane irin Operating System yake amfani da shi yace Antivirus.

(2) Da za ka ambaci sunan wani bangare na jikin compter da asalin sunan ta ba zai gaya maka ba, shi dai yana amfani da computer iya abin da yaga ana amfani da shi,  iya abin ya iyakera.

(3) Da za ka tambaye shi meye amfanin wannan program abin da ya ke ganin yafi kwarewa a wajen amfani da shi, shi zai ce maka shine amfanin shi, ko da kuwa ba haka ba ne.

(4) Abu na karshe idan ka tambaye shi ya kana binkice game da wannan harkar tashi? Zai ga ya maka ai shi ko makaranta bai jeba.

Idan kuwa ka koma ta bangaren cin banza a harkar computer mu samman ma a Abuja, tun da yaran sun fahinci iyayen su ba su san computer ba, za ka samu kashi saba’in cikin dari na yaran da suke zagaya ofisoshin manyammu  basu san komai ba, wanda banda bagun kwali babu abin da suke yi, su dai manyammu abin da suke yi shine idan yana son ya bude wani file bai gane ba sai ya ce computer ta samu matsala, shi kuma gogan naka da zarar yaji wayar mai gidanshi ai ya san ta fadi gasasshiya, wasu ma yaran sune suke installing wasu program da zai sa computer  ta sami matsala a daidai wani lokaci, yadda dole a neme su, idan hakan ta faru.

Mafi yawan compter da ake kankaresu, ba ita ba ce matsalar , bai wuce ace a rage program da compter take tashi da su ba.

Kusan computoci kashi casa’in da biyar cikin dari da ake formatting a Najeriya ko kadan ba lalacewa su ke yi ba, da zarar mutum ya ga na’urar shi ta fara wata yar matsala sai kaga injiniya yace sai an yi formatting dinta. Za ka ga wanda ya iya bude imel ko browsing a internet keyi mata fankama da cewar ya gama da ita, wanda da zaka tambaye shi wata matsala yar karama za ka sha mamaki amsar da zai baka. Idan ka duba sai ka samu kwata-kwata abubuwan da ake anfani dasu a computer bama iya sarrafasu kashi goma cikin dari na abin da yakamata a sarrafa sai dai downloading, duk wani web site da za’a sami kayan cuta mun kware a shigar shi, burin mu kullun mu dauko wani application da zai bamu damar rusa katangar da kamfanonin sadarwa na waya da suke yi domin mu samu damar yin browsing, kowa ya iya amfani a facebook da twitter , da yawa sun iya shiga torrent su yi  downloading software.

 Yanzu mu shi ke nan iya inda muka sa gaba ke nan? Duk wandancan suna ye da ake kiran mu guru ko hacker ko wizard da ake yi sabo da mun iya sarrafa program kawai, to, wadanda suka kirkire su su kuma kira su da mene?

Don na iya installing program sai a kirani engineer? Wadanda suka kirkiri na’urar ace musu mene?

Ina rantsuwa da ALLAH wanda raina ke hannunsa, da za mu dawo daga harkar karba mu komo harkar bayarwa da za mu fi samun daukaka.

Ka duba canji da ake samu a lokaci da aka bude makarantar informatics da take Kazaure a Jihar Jigawan Najeriya, kusan yanzu idan ka samu dalibai goma ‘yan’ Arewacim nigeria wadanda suke amsa sunan su a harkar Computer a wannan lokaci za ka samu biyu sun yi informatics ne, idan kuma duka goman ka samu ‘yan makarantar ne , za ka samu takwas suna son su je karo ilimi, halin rashi ya hana su zuwa. Kuma da gaske ba ko wane dan informatics bane yasan abin da ya ke yi amma, saboda malaman da suka samu gogaggu, kwararru za ka samu da yawa daliban sun san abin da suke yi sannan suna son su ci gaba da karatunsu, ko da yake a wancan lokaci, kafin a bata al’amuran karatun.

Wani abin jin dadi shine, idan ka tafi kasahe irin su Malaysia ko Singapore za ka samu daliban da su ke karanta fannin computer da fannonin kimiya da fasaha da bangarorin likitanci za ka samu mutanan mune. Alhamdu Lillah, da alama ana samun nasara, duk da cewa wasu daga cikin yaran iyayen su ne suka dauki nauyin kai su suyi karatu, wasu kuma gwamnatin jiha da ta taraiya su suka dauki nauyin su. Ana samun wasu daga cikin su sun mai da hankali matuka kuma suna fahimtar abin da ya kai su. Wasu abin ban takaici basu san ma abin da ya kai su ba sun yi tsammani yawon shakatawa su ka jeyi da yawon bude ido, domin wasu daga cikin su banda shaye-shaye da harkar klob ba a bin da ya ke a gaban su. Wasunsu kuma koma wa suke safarar miyagun kwayoyi abin dai babu dadin ji.

Amma duk da haka an samu canji in ka danganta da baya lokacin da manya-manyan jami’o’inmu suke kokarin yaye hazikan dalibai, amma su daliban ban da confusion babu komai a kawunansu (agafarce ni) wanda  idan aka yaye dalibai dari uku zai wahala a samu dalibai guda dari wanda suka fahimci inda suka sa gaba.

Gyara kayanka bai zama sauke mu raba ba.

Dukkanin wadannan bayanai da na jero, ko da wasa bana yi bane domin in ci zarafin wani ba ne, kuma ban  ambaci sunan wani domin wulakanci ko tozartarwa. Na yi hakane domin mai karatu ya gane inda muka sa gaba, da kuma irin aikin da ke kanmu.

Koma baya ka tambayi kanka wace al’ummace ta ci gaba a duniya wacce ba tayi amfani da harshen iyayenta ba. Kama daga kasar turai kasan mafi yawan ilimi da suke takama da shi na wasu ne, suka daukoshi suke canja shi ya koma yaren su, koma kasahen faransa kaga duk littattafai da suke karantar da yayansu na (Physics da Chemistry) da makamantansu duk da yaransu ake rubutashi. Ko za ka gaya mini mutanen jamus da faransanci suke koyar da al’ummarsu? Da jamusanci ne suke koya musu, koma kasar Italy da Rasha cikin su babu wanda yake jin yaren wani, amma sun sami cigaba ta fannin kimiya da fasaha, bani kasahen larabawa da canisawa ana ganin irin cigaban da suka samu suma suna amfani da yarensu ne. Ballantana India wanda suka yi wa duniya zarra ta fannoni da dama, turanci shine yaren kasar amma mafi yawanci takardunsu da hindu ake karanta su kuma dukkan wadannan kashashe dana ambata ba wai sun yi haka bane domin kabilanka  bane sai domin wanda yake jin yarensu koda bai iya karatu ba ya fahimci in da a kasa gaba.

Ni ma ba nace a koma koyar da yaranmu da Hausa ba ne, ko Yarbanci, ko kuma Inyamiranci ba, amma abinda nake nuna mana da za a mayar da hankali wanjen koyar da yaran turanci su sanshi so sai, gwamnati ta dauki nauyin koyar da shi tun daga Firamare yaro ya sanshi sosai, ai kaga ba illa bane. Shi fa wannan yare da ake kokarin a koyar da karatu da shi, daidai yake da ko wane yare, idan har a makarantar Computer irin tawa zan karantar da yaran hausawa ilimin computer su fahince ta kamar yadda wanda ya koya da turaci, koma ya fishi, banga dalilin da zai sa in koyar da shi da turanci ba. Wannan ra’ayina ne, ba kuma dole ya zama ra’ayin mai karatu ba. Koma bangaren noma, akwai ci gaba da aka samu mai yawa ta fannin noma da kiwo a zamanance, wanda idan da abubuwan da ake karantar da mutanenmu a department na Agric za a samu wasu su rinka koyar da iyayenmu na gida a yarukansu da za a ga ci gaba mai yawa. Da yawa daga cikin mutanen da suke za ka samu ba su taba zuwa makaranta ba, amma tunda ya gaji noma kaka da kakanni zai gaya maka tsawon kwanaki da tumatiri yake yi kafin ya fito, ya kuma gaya maka kwana nawa yake yi idan ya fito kafin ya fara fire, ya kuma gaya maka kwana nawa yake yi idan ya fara ‘ya’ya har ya isa a cire shi. Wannan a takaice abinda muke nunawa a nan, shine gaskiya babu wayarwa a cikin abubuwanmu na yau da kullum, burinmu shine idan ka gane abu to baka son kowa ya gane, shi wannan ilimin na banzane ba zaka kaje lahira a tambayeka ba, kuma duk ilimin da kayi na zamani amfaninshi shine ka koyar da wani idan har ya koya duk lokacin da ya sami alheri zai tuna ka, kuma yayi maka addu’a ko da baya so.

Sabo da haka, ina kira ga duk wani mutum wanda yake kishin ci gaban alummar shi, da ya sa dammara wajen wayarwa da al’ummarshi ta fannin ci gaba a rayuwa, idan ya san abu, wani yazo tambayarshi ya sanar da shi, ba wai alfahari ba kusan duk abinda na iya ko na sani wani ya koya mini, ni kuma banga dalilin da zai sa wani ya tambaye ni, abu in ce ban sani ba, alhali  na sani.

Daga karshe ina kira ga duk wanda zai karanta wannan mukala da yayi mini adalci, sannan a sani dukkan wadannan bayanai da na fadi a cikin wannan mujallar, maganganu ne irin wanda Malamai, da Dalibai suke yi a ko wane lokaci a ko wane lungu. Kiran sunan informatics da nayi, domin cancantane ba domin son kaiba, da na kira sunan makarantar da nayi, domin so-so ne amma son kai yafi. Kuma irin wannan abu da wasu shuwagabanni suke yi na hangen nesa yaci a jinjina musu, kamar kirkiro irin wadannan makarantu da ake yi a jahohinmu na Arewacin Najeriya. Wanda a da sai dai kaji labarin a makwabtanmu.